Rreth 40 minuta ka qëndruar Prefekti i Qarkut të Vlorës, Vangjel Tavo në Prokurorinë e Posaçme (SPAK) ku u paraqit këtë të martë.
Pas daljes nga SPAK, në prononcimin për mediat, Tavo ka deklaruar se është pyetur si personi në dijeni për një kallëzim të bërë në vitin 2021.
Kujtojmë se referuar raportimeve mediatike, Vangjel Tavo del si i përfsdhirë dhe në dosjen e lobimit të LSI-së që po hetohet nga SPAK, ku dyshohet se LSI ka lobuar pranë zyrtarëve amerikanë në prag të zgjedhjeve të vitit 2017 në Shqipëri.
Sipas gazetatës amerikan Mother Jones, në prag të zgjedhjeve presidenciale dhe parlamentare të Shqipërisë, Grupi McKeon nënshkroi me LSI-në një kontratë lobimi prej 15 mijë dollarësh në muaj. Kontrata nuk u nënshkrua nga zyrtarët e LSI-së, por nga një avokat grek me emrin Iraklis Fidetzis, me të cilin kishte njohje njëri prej njerëzve të LSI-së, Vangjel Tavo.
Gjithashtu u hodhën dyshime se një vizitë e Vangjel Tavos në Uashington në fund të prillit 2017 lidhet me takimet që Grupi McKeon po organizonte me republikanë të Kongresit për llogari të firmës Dorelita.
Vlen të theksohet fakti se Vangjel Tavo u emërua nga Këshilli i Ministrave më 13 Mars në postin e Prefektit të Qarkut të Vlorës. Referuar burimeve të mediave greke, Rama e ka emëruar në këtë post Vangjel Tavon që më pas, kur të mbahen zgjedhjet e parakohshme lokale në Himarë, ta kandidojë si kryebashkiak nën logon e Partisë Socialiste.
Vangjel Tavo ka qenë më herët deputet i LSI (sot PL) dhe ministër i Shëndetësisë (2012-2013).
