Policia e Vlorës publikoi sot pamjet e arrestimit të 39-vjeçarit mbrëmjen e djeshme i cili qarkullonte me pistoletë dhe municione në makinë.
Burime zyrtare nga policia bënë me dije se pas hekurave ra shtetasi me inicialet Mariglen Hamzo, banues në Vlorë.
uniformat blu i kanë sekuestruar në flagrancë një armë zjarri pistoletë, me krehër me municion luftarak.
“Finalizohet nga Sektori i Krimeve të Rënda i DVP Vlorë, në bashkëpunim me Komisariatin e Policisë Vlorë dhe Forcën e Posaçme “Shqiponja”, operacioni policor i koduar “Strike 13”. Policia sekuestroi 1 armë zjarri pistoletë, me krehër me municion luftarak. Shërbimet e Policisë, në vijim të punës për parandalimin dhe goditjen e veprimtarisë kriminale në fushën e armëmbajtjes pa leje, bazuar edhe në informacionet e siguruara në rrugë operative se një shtetas lëvizte i armatosur, në lagjen “29 Nëntori”, kanë organizuar dhe finalizuar operacionin policor të koduar “Strike 13”, në kuadër të të cilit u bë arrestimi në flagrancë i shtetasit: – M. H., 39 vjeç, banues në Vlorë. Gjatë operacionit, shërbimet e Policisë kanë ndaluar automjetin tip “Opel”, me të cilin lëvizte 39-vjeçari, dhe kanë ushtruar kontroll, gjatë të cilit, në pjesën e kroskotit, gjetën dhe sekuestruan në cilësinë e provës materiale, 1 armë zjarri pistoletë me krehër dhe municion luftarak”, njofton policia.
Vijojnë veprimet hetimore për dokumentimin e plotë të veprimtarive kriminale të këtij shtetasi. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.
Kujtojmë që mbrëmjen e djeshme forcat e shumta Operacionale dhe ato “Shqiponja” janë angazhuar për të zhvilluar një aksion në qytetin bregdetar për ndalimin e personave me rrezikshmëri.
Por pavarësisht se u angazhuan qindra forca policie, uniformat blu sot kanë njoftuar se vetëm një shtetas është arrestuar për shkak se qarkullonte i armatosur.
Policia ditën e djeshme nxori informacione për mediat se ky aksion u shtri në disa pika të qytetit për të arrestuar personazhe të botës së krimit por në fund operacioni ka dështuar me vetëm një person të prangosur.
Natyrshëm lind pyetja: Përse i duhet policisë gjithë kjo “fryrje” e madhem, kur në fund rezulton i gjithë aksioni i policisë një “flluskë sapuni” ku nuk ka asnjë rezultat konkret.
