Gjykata e Tiranës ka lënë fuqi masat e sigurisë për urdhër-arrestet e lëshuara nga Prokuroria për administratorët e subjekteve financiare dhe përmbaruesve në lidhje me skandalin e mikrokredive.
Më konkretisht ka lënë në fuqi masën e sigurisë “Arrest në burg”, për shtetasit Aldo Daka, Albert Gega, Edmond Mato dhe Arben Meskuti, si dhe masën e sigurisë “Arrest në shtëpi”, për shtetaset Kejda Seferi, Elda Ibro, Alketa Tanushi dhe Jorsida Dervishi. Teksa vazhdon të jetë ende në kërkim 43-vjeçari Alban Kote, të cilin Policia nuk arriti dot ta vinte në pranga.
Gjatë seancës gjyqësore një prej të dyshuarve iu drejtuar togave të zeza duke thënë “Po gjykohen si në komunizëm, kanë ushtruar aktivitet të ligjshëm dhe se nga ana e përmbaruesve janë zbatuar detyrimet. Nuk jemi në komunizëm që na gjykon populli dhe vendos gjykata”.
“Jam thjesht një rrogtar me një pagë qesharake”, deklaroi një nga personat e akuzuar që ka punuar si përmbarues, duke pretenduar se nuk ka kryer asnjë shkelje ligji.
Ndërsa të dyshuarit e tjerë nuk kanë folur ndërsa mbrojta ka kërkuar që të specifikohen se çfarë shkeljesh kanë bërë secili prej tyre.
Personat e akuzuar dyshohet se kishin ngritur një skemë mashtrimi duke përfituar një vlerë prej 7 milion eurosh. Skema funksiononte duke blerë kreditë e këqija nga bankat e nivelit të dytë nga zyrat përmbarimore, të lidhura me institucionet e mikrokredive, duke formuar kështu një rrjetë merimange, ndërsa qytetarët trajtoheshin si një mundësi e “artë” për ti rrëmbyer gjithçka.
Ndaj tyre ushtrohej presion që konsistonte në marrjen e kredive të reja, me logjikën se përmes tyre do të shlyeshin kreditë e vjetra, ndërkohë që kredimarrësit (qytetarët) hynin në një rrjetë merimange që nuk dilnin dot më. Dhe në momentin që nuk arrinin të shlyenin këto kredi, zyrat përmbarimore vepronin duke i marrë pronat.
Subjektet mashtruese në këtë veprimtari, sipas dosjes së Prokurorisë, janë: Micro Credit Albania, ADCA, SHP Zig, FS dhe FLASH.
“Piramida” e mikro-kredive/ Skema me pesë hapa që zhyti financiarisht mijëra shqiptarë
