Një protestues është arrestuar nga Policia dhe tre të tjerë janë proceduar penalisht pasi akuzohen se kanë hedhur molotov drejt godinës së Bashkisë së Tiranës, ku u kërkua dorëheqja e Erion Veliajt pas aferës “5D”
Sipas policisë, në pranga ka rënë një 38-vjeçar, i cili është ndaluar edhe më datë 16 maj në lidhje më protestën e mbajtur më 14 maj te Bashkia. Ndërkohë procedimi ka nisur për një 21-vjeçar, një 41-vjeçar dhe një 49-vjeçar po për të njëjtat akuza.
Ata akuzohen për veprat penale: “Shkelja e rregullave mbi lëndët plasëse dhe djegëse”, “Shkatërrimi i pronës me zjarr”, dhe “Goditjet për shkak të detyrës”.
Njoftimi i policisë:
“Drejtoria Vendore e Policisë Tiranë, në lidhje me aktet e dhunshme të ushtruara gjatë protestës së zhvilluar më datë 21.05.2024, përpara Bashkisë Tiranë, nga Aleanca për Mbrojtjen e Teatrit, në vijim të veprimeve hetimore e procedurale dhe nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, ndaloi shtetasin:
– E. V., 38 vjeç, banues në Kurbin, për veprat penale “Prishja e qetësisë publike”, “Shkelja e rregullave mbi lëndët plasëse dhe djegëse”, “Shkatërrimi i pronës me zjarr”, dhe “Goditjet për shkak të detyrës”. Ky shtetas është ndaluar dhe më datë 16 maj, në lidhje me protestën e datës 14 maj 2024.
Gjithashtu u proceduan në gjendje të lirë shtetasit K. B., 21 vjeç, S. J., 41 vjeçe, të dy banues në Tiranë, dhe S. B., 49 vjeç, banues në Krujë.
Materialet i kaluan Prokurorisë për veprime të mëtejshme”, njofton policia.
