Të shumtë kanë qenë politikanët të cilët janë paraqitur para prokurorëve të SPAK dhe oficerëve të Byrosë Kombëtare të Hetimit në godinën e Prokurorisë së Posaçme për të dëshmuar si persona në hetim apo persona në dijeni për çështje të caktuara.
Por, ajo që duket se i ka vënë në “garë” politikanët, është se kush do e thyejë rekordin e qëndrimit më shumë orë me “kolegët” e SPAK-ut. Deri më tani rekordin e mban ish-ministri i Shëndetësisë, Ilir Beqaj, i cili ka qëndruar për më shumë se 9 orë në SPAK, ku ka dëshmuar në lidhje me dosjen e sterilizimit.
Pas tij, vjen kryebashkiaku i Tiranës Erion Veliaj, i cili po ashtu ka qëndruar për mbi 7 orë duke dëshmuar para “kolegëve” për aferën e inceneratorit të Tiranës. Lista plotësohet me Arben Ahmetajn mbi 5 orë në SPAK, teksa pas tij e shumë të tjerë si Belinda Balluku, Olta Xhaçka, Engjëll Agaçi, etj.
Por, sot ishte radha e kreut të SPAK, Altin Dumani për të dëshmuar para politikanëve, më konkretisht para deputetëve të Komisionit të Ligjeve, ku ka raportuar raportin vjetor të punës së SPAK për vitin 2023, teksa iu është përgjigjur edhe pyetjeve të ligjvënësve.
Seanca dëgjimore filloi në orën 10:00 dhe përfundoi në orën 15:05. Ka qenë vetë Dumani, i cili i ka kërkuar leje kryetares së Komisionit të Ligjeve, Klotilda Bushkës, për t’u larguar në orën 15:00, duke bërë kështu që shumë pyetje deputetët t’i binin shkurt, dhe po ashtu edhe përgjigjet e Dumanit.
Nëse Dumani nuk do të kishte kërkuar leje, me shumë mundësi do e kishte thyer dhe rekordin e Ilir Beqajt në SPAK për mbi 9 orë. Siç duket, deputetët u hakmorën sot ndaj Dumanit, duke qenë se SPAK i mban me orë të tëra për të dëshmuar.
Xhafaj, Gjiknuri e Xhaçka, 6 deputetë, subjekte të SPAK që s’duhet të ishin në raportimin e Dumanit
