Deputeti i PD-së, Luan Baçi ka komentuar mundësinë e rikthimit të ligjit për importin e mbetjeve për të cilin u shpreh se vendi ynë aktualisht është në një situatë alarmante sa i përket plehrave të groposura apo në landfille.
Ai tha se Rama është duke u përpjekur të miratojë sa më shumë ligje në interes të tij duke qenë në fund të pushtetit të tij. Sipas tij kjo është vërtet një aferë kriminale që po drejtohet sërish nga kryeministri dhe se qytetarët duhet të reagojnë.
“Si mund ta shohësh një çështje të tillë si çdo çështje tjetër që kjo qeveri e kthen dhe rikthen. Jemi në një situatë alarmante ku mbetjet janë kthyer në shqetësim, ku mbetjet groposen në gropa gjigante sepse kemi tre inceneratorë në letra dhe asnjë në punë. Inceneratori i Fierit që disa herë kanë premtuar ta vënë në punë e mbajnë si një ngrehinë të kalbur. Kemi një rikthim përsëri në 2013 që ishte kjo qeveri që ndaloi importin e mbetjeve mori masa, bëri premtime, nisi ndërtimin e inceneratorëve dhe sot jemi në një situatë alarmante. Shqipëria ka mbetje plot këtu pse u dashka miratuar një ligj që nuk bëhet transparentë. Ky është një problem shumë shqetësues për të gjithë shqiptarët”, tha Baci per MCN.
I pyetur pse risillet ky ligj paka para zgjedhjeve, Baçi u shpreh se Rama e ndjen dhe e di mirë që s’ka më shanse dhe mundësi që ai të vazhdojë të qeverisë dhe do mundohet të miratojë me forcën e kartonit dhe arrogancën që e karakterizon si maxhorancë ligje në interes të vetin.
“Bizneset janë të porositura nga Rama, pra dhe për këtë projektligj dhe shumë të tjera Rama i ka në funksion të mbajtjes së pushtetit duke parë se e shikon vete se përballë nuk ka më një opozitë të rrëzuar dhe e parë në këtë këndvështrim çdo projektligj që përpiqet ta kalojë në kuvend është në interes të tij.
Kjo është vërtet një aferë kriminale që po drejtohet sërish nga kryeministri. Ishte po ai që bëri një propagandë të madhe për inceneratorët dhe sot kemi një rezultat me dhjetëra qindra miliona të hedhura poshtë dhe asnjë nuk ekziston dhe përsëri kryeministri del dhe thotë se me çeljen e negociatave po hyjmë në një faze të re, për përpunimin e mbetjeve kjo është e turpshme që kërkon ta japë si një zgjidhje të re importin e mbetjeve.
Parë në këtë këndvështrim qytetarët shqiptarë duhet të reagojnë sepse çdo gjë që bëjnë e bëjnë të para përgatitur. Është kriminale dhe duhet reagim i të gjithëve”, tha ai.
