Autoritetet policore italiane kanë arrestuar katër shqiptarë, teksa akuzohen për posedim dhe trafikim të lëndëve narkotike. Shqiptarët e vënë në pranga janë të moshës nga 23 deri në 42 vjeç dhe banues në provincat e Firences dhe Arezzo-s.
Mediat përtej Adriatikut raportojnë se karabinierët, pasditen e të premtes rreth orës 18:00, pranë stacionit të trenit San Pietro a Vico, vunë re dy makina të dyshimta. Fillimisht një BMW me tre persona në bord (42-vjeçari, 32-vjeçari dhe 24-vjeçari) dhe pak minuta më pas një Volkswagen Polo me një person në bord (23-vjeçari), i cili parkoi pranë makinës së parë në Via Stazione III në Lucca.
Të katër shkëmbyen vendet disa herë, duke ecur në një mënyrë të kujdesshme dhe të dyshimtë, dy u larguan dhe takuan një person të pestë, i cili mbërriti me biçikletë dhe më pas iku menjëherë.
Gjithmonë me një pako dhurate në dorë,e ngjashme me ato në raste Krishtlindjesh, me zarf të kuq dhe shirit të artë.
Pas këtyre lëvizjeve të dyshimta kanë ndërhyrë Karabinierët, duke kontrolluar dy makinat dhe katër pasagjerët. Policia gjeti 335 gramë kokainë brenda pakos “dhuratë”.
Më pas, në kontrollet e ushtruara në shtëpitë e të arrestuarve u zbuluan edhe substanca narkotike. Brenda shtëpisë së 32-vjeçarit u gjetën 1.3 kilogramë hashash, i ndarë në mënyrë perfekte në pako gati për shitje, si dhe një peshore, ndërsa në shtëpinë e 23-vjeçarits 50 gram marijuanë.
Të arrestuarit u shoqëruan në burgun e Luccas.
