Egnatia ka fituar për herë të dytë radhazi Kupën e Shqipërisë teksa mposhti në finale Kukësin.
Sfida në “Air Albania” u mbyll 1-0 në favor të skuadrës nga Rrogozhina në një sfidë tepër të luftuar nga të dyja skuadrat.
Goli i cili rezultoi vendimtar në fatet e sfidës erdhi në minutën e 38-të. Aksion i gjatë i Egnatias me Fangajn në të djathtën, i cili pason në qendër duke gjetur Ndrecën me këtë të fundit që nuk gabon duke shënuar përballë ish-skuadrës.
Në pjesën e dytë Kukësi u duk më kërkues, duke humbur një rast të mirë me Franci Lalën, por pa mundur të ngacmojë portën e Sherrit. Në minutën e 79, edhe me ndihmën e VAR Egnatia fitoi një penallti për prekje të topit me dorë në zonë.
Nga 11 metra largësi braziliani Fernando u ndal nga Tafas që kuptoi krahun, por që në fund verilindorët nuk ia dolën të merrnin trofeun e tretë. Kështu, Egnatia siguron trofeun e dytë në Kupën e Shqipërisë, teksa do luajë edhe në “Final 4” për të tentuar edhe trofeun e Superligës.
Nga ana tjetër Kukësi nuk ia del ta mbyllë sezonin me trofe, teksa sezonin e ri do jetë pjesë e Kategorisë së Parë.
