Gazetari Blendi Fevziu ka qenë i ftuar në emisionin “Të Paekspozuarit”, ku ka folur për aferën e llahtarshme në Bashkinë e Tiranës, ku drejtorët e Erion Veliajt, sipas dosjes së SPAK, kishin ngritur një kompani të cilën e përdornin për të marrë tendera.
Fevziu deklaroi se është surprizuar nga kjo aferë dhe nga niveli i korruptimit të drejtorëve, madje e quajti Shqipërinë edhe “Republikë e drejtorëve”. Lidhur me përgjegjësinë e Veliajt, Fevziu tha se ai ka përgjegjësi politike, por nuk u shpreh nëse duhet të largohet nga detyra.
Biseda në studio:
Blendi Fevziu: Dua të flas me çfarë kam parë në dosje deri tani dhe i referohem dosjes, është e pabesueshme. Në historinë 34 vjeçare të ndjekjes së ngjarjeve, një gjë e tillë është befasuese. Kur e dëgjova nga Këlliçi fillimisht dhe kur u konsultova me disa persona, edhe një vit përpara, isha i befasuar. Kishte një rezervë sepse thashë, mos ekzagjerohet. Keni shkruar dikur një shkrim, “shteti i Eminit”, një shkrim në të cilin merrje një këshilltar të kryeministrit dhe e vinit si personifikimi i absurdit, ku kryeministri përtonte të merrej me punë dhe ia kishte lënë Eminit, që pastaj fitoi edhe një lloj arrogance. Kjo duket një Republike drejtorësh, me çfarë kemi parë deri tani. Është arrogance e një Republike drejtorësh, që janë të rinj dhe duhet të ishin krejt ndryshe, vijnë me shkollim të huaj dhe rezultojnë më hajdutë se ata që kanë qenë përpara. Më arrogantë dhe më të shpifur. Kjo lloj arrogance, kjo lloj sigurie, çon në këtë abuzim që kalon çdo limit. Kanë një bindje që kjo gjë nuk do të ndodhte kurrë. Jemi në një vend ku abuzimi ka shoqëruar këtë vend.
Ylli Rakipi: Po pranojmë që është një Republikë drejtorësh, pesë drejtorë në Bashkinë e Tiranës, që kanë kryer këtë akt të pabesueshëm, arrogant, etj. Tani, nëse ky që është lart mbi drejtorët… Njeriu që drejton, minimalisht nuk duhet të jetë, sepse qenka budalla pastaj, kryetari i Bashkisë, që është një administrator.
Blendi Fevziu: E paskam pyetur për këtë aferë zotin Veliaj, me emrin e drejtorit dhe me shumën konkrete. Ai tha nuk është e vërtetë. Minimalisht, duhet ti bëhet pyetja, pse ke mbajtur këtë qëndrim. E ke bërë se ke dashur ta mbrosh apo nuk ke ditur? Kur e dëgjon këtë pyetje dhe përgjigjen, fillon investigon. Pika e dytë, duhet të japë përgjigje Veliaj vetë.
Ylli Rakipi: Veliaj nuk të jep përgjigje sepse ai nuk vetë-akuzohet. Por ne jemi gazetarë. Nëse një titullari i vjedhin gjithë paratë dhe i bëjnë rrush e kumbulla, minimalisht duhet të largohet.
Blendi Fevziu: Po padyshim duhet të marrë përgjegjësi politike. Pastaj ai duhet të japë shpjegime se cfarë ka ndodhur.
