Kreu i PD-së, Sali Berisha, gjatë fjalimit të mbajtur në tubimin e mbrëmjes së sotme, ka komentuar dokumentarin e publikuar nga televizioni italian “RAI3”, ku dlshmonte lidhjet e qeverisë dhe të Sekretarit të Përgjithshëm të Këshillit të Ministrave, Engjëll Agaçit me krimin.
Berisha tha se dokumentari fakton se qeveria dhe kreu i saj janë një mafie kokaine dhe heroine, një mafie droge e rrezikshme për Shqipërinë, për Italinë dhe për Europën. Sipas Berishës, faktohet se Olsi Rama ishte personi kryesor me Genti Xhixhën, Ermal Hoxhën, Gentian Gjonajn që instaluan në Xibrakë fabrikën më të madhe të kokainës në Ballkan.
Ndër të tjera, Berisha deklaroi se nga dokumentari vërtetohet se Edi Rama i ka besuar Engjëll Agaçit lidhjet me krimin në Shqipëri dhe përtej Adriatikut. Po ashtu, lideri demokrat tha se vërtetohet edhe se si vetingu u përdor për gjueti shtrigash.
Berisha: Mbrëmë publiku italian ndoqi një nga dokumentarët më tronditës në historinë e televizioneve italiane. Ndoqi një dokumentar kushtuar mafies shtetërore shqiptare. Një dokumentar të faktuar se qeveria, kreu i saj janë një mafie kokaine, janë një mafie heroine, janë një mafie droge, e rrezikshme për Shqipërinë, e rrezikshme për Italinë, e rrezikshme për Europën. Të dashur miq, çdo orë që kalon, çdo ditë që kalon sjell dëshmi tronditëse se çfarë bëhet me fatin e shqiptarëve. Se si luhet me fatin e tyre. Se si shkelmohet mbi qenien e tyre. Çdo ditë që kalon fakton kontrollin e plotë dhe total të asaj që iu serviret shqiptarëve si drejtësi e re, drejtësi e krimit, drejtësi e narkoshtetit, drejtësi e kleptokracisë. Çdo ditë që kalon është një apel për ne që të marrim fatin në dorë. Dokumentari faktonte se Olsi Rama ishte eksponent kryesor i klanit të Hakmarrjes për Drejtësi të kokainës së Xibrakës. Fakton ato që kemi denoncuar me qindra herë se Olsi Rama ishte personi kryesor me Genti Xhixhën, Ermal Hoxhën, Gentian Gjonajn që instaluan në Xibrakë fabrikën më të madhe të kokainës në Ballkan, në të cilën u gjetën mbi dy tonelata drogë. Tregon falsitetin e hetimit. Personi i panjohur Olsi Rama nuk u emërtua kurrë, ndonëse u fotografua, u filmua në të gjitha aktivitetet e klanit.
Dokumentari fakton se aktet ligjore, nënligjore të vendit, vendimet e qeverisë, lidhjet me krimin, në të dy anët e Adriatikut, Edi Rama ia ka besuar Engjëll Agaçit, këtij mafiozi të shpëlarë, të zhytur në krime, vjedhje dhe abuzime. Dokumentari fakton se si vetingu u përdor për gjueti shtrigash. Se si u nxorën nga sistemi të gjithë ata burra dhe gra që guxuan të lëshojnë fletë arresti, të arrestojnë serial killerët, të arrestojnë bosët e bandave që ishin miq të qeveritarëve të sotëm. Të gjitha këto në një dokumentar mjaftojnë për të rrëzuar tre herë një qeveri. Por kjo nuk ndodh sepse kjo qeveri ka blerë mediat, ka blerë bandat, ka blerë me miliona e miliona, me korrupsion transnacional, McGonigal dhe kompani. Ç’mbetet atëherë miqtë e mi? Mbetet të marrim fatin në dorë një minutë e më parë. T’i dalim fatit tonë për zot.
