Një shumë prej 350 mijë paund, që dyshohet e përfituar nga veprimtari kriminale është sekuestruar nga Agjencia Kombëtare e Krimit në Britaninë e Madhe. Mësohet se këto para do vinin ‘të pastroheshin’ në vendin tonë.
Lidhur me rastin janë vënë në pranga katër persona që dyshohet se janë të përfshirë në kontrabandën e këtyre parave kriminale.
Lajmi bëhet i ditur nga NCA, e cila njofton se të dyshuarit u arrestuan më 13 prill gjatë një serie kontrollesh të koordinuara që filluan me arrestimin e një shtetasi shqiptar 48-vjeçar në Dover. Përafërsisht 200,000 stërlina para në dorë iu sekuestruan automjetit të tij, i cili dyshohet se ishte rrugës për në Shqipëri.
Dy persona të tjerë, të moshës 34 dhe 22 vjeç, dhe një djalë 17-vjeçar u arrestuan në adresat në Tottenham Hale, Londër, dhe rreth 150,000 £ në para të gatshme u sekuestruan në një automjet të dytë.
