Kreu i grupit parlamentar të PD-së, Gazment Bardhi i ka bërë thirrje nga foltorja e Kuvendit kreut të SPAK, Altin Dumanit që të hetojë padinë e dorëzuar së fundmi prej tij, ku implikohet Olsi Rama, vëllai i kryeministrit Edi Rama në laboratorin e kokainës së Xibrakës.
Sipas Bardhit, Rama mashtron kur thotë se për atë dosje ka një hetim përfundimtar, pasi sipas tij fraksioni 335/1, për “personi e paidentifikuar” është pezulluar në vitin 2018 dhe “fle” prej vitesh në sirtarët e Prokurorisë së Posaçme.
Bardhi tha se Policia nuk ka qenë bashkëpunuese me Prokurorinë dhe këtë e konfirmoi edhe kreu i SPAK ditën e sotme. Ai tha se pse nuk u publikua fotoja të vërtetohej se kush ishte ai personi 45 vjeç.
“Do të doja ashtu si kushtetuta e detyron që Rama të ishte ne seancën dhe të jepte llogari mbi atë që e ka konfirmuar drejtuesi i SPAK Altin Dumani gjatë raportimit në Këshillin e Lartë të Prokurorisë. Ai është shprehur se e ka të pamundur të bashkëpunojë me policinë e shtetit pasi i rezulton që një pjesë e punonjësve të policisë së shtetit janë bashkëpuntorë të organizatave kriminale.
Kam nxjerr një dosje nga arkiva e prokurorisë që provon ekzaktësisht këtë që ka provuar sot drejtuesi i SPAK. Policia e shtetit në këtë dosje thekson se është e mpiksur me organizatat e krimit të organizuar. Do të duhej që Rama të vinte këtu dhe të jepte deklaratat e tij sa i përket hetimit për dosjen e Xibrakës. Sipas prokurorisë në datën 8 mars 2016 prokuroria për krimet e rënda ka ndarë një hetim të veçuar 335/1 i cili është pezulluar në vitin 2018 dhe ndryshe sa gënjeu Rama kjo nuk është një çështje e hetuar dhe gjykuar në mënyrë përfundimtare.
E vërteta është se ajo dosje flinte e qetë në arkivat e Prokurorisë së Posaçme duke lënë një pjesë të organizatës së Xibrakës të mos hetohej. Olsi Rama në vitin 2014 ishte 45 vjeç dhe kartela e të vëllait e provon këtë gjë. Makina është me targa AA653DM. E thotë TIMS-i që makinën me këtë targë e ka përdorur Olsi Rama. Provohet ekzaktësisht se Olsi Rama gjatë kohës që ngrihej laboratori i Xibrakës ka përdorur këtë automjet
Do të doja shumë që të vinte këtu dhe të thonte se ke bërë denoncime të pavërteta dhe se ai ishte përdorues i automjet AA 653 DM e cila është përdorur dhe nga trafikantët e Xibrakës.
Dosja e thotë se- Në orën 15:50 të datës 13 janar 2015 u fut në sheshin e pallateve në apartametin që ishte në zotrim të krerëve të organizatës kriminale u fut mjeti AA 653 DM me drejtues personin e moshës 45 vjeç. Do të doja të vinte këtu dhe të thoshte që ke hamendësuar një gënjeshtër dhe Olsi Rama është një përdorues i makinës por nuk vend dot pasi nuk e thotë Bardhi po e thotë dosja e prokurorisë sipas vërtetimit të sistemit TIMS ku Olsi Rama është përdorues i këtij automjeti.
Pse nuk u hodh foto, por u zbulua vetëm mosha, kush ishte ky person i paidentifikuar i moshës 45-vjeç që ishte përdorues i të njëjtit automjet gjatë mbledhjes së organizatës kriminale.” – tha Bardhi.
