Komisioni i Pavarur i Kualifikimit shkarkon nga detyra prokurorin e prokurorisë së Beratit, Dritan Gripshi. Shkak për shkarkimin e tij ishin problematikat në kriterin financiar.
Vendimin për shkarkimin nga detyra të Gripshit e mori trupa gjykuese e kryesuar nga Genta Tafa Bungo, me relatore Suela Zhegun dhe anëtar Roland Ilian. Gripshi gjatë seancës dëgjimore dha sqarime për burimet e pasurisë, duke dhënë dhe provat përkatëse që sipas tij sqaronin pozicionin financiar. Por, trupa gjykuese pasi shqyrtoi dokumentacionin vulosi shkarkimin e tij.
Gripshi gjatë seancës së zhvilluar sot, pas komunikimit të vendimit reagoi, duke theksuar se provat e dorëzuara prej tij nuk paskan pasur asnjë vlerë.
Dritan Gripshi e ka filluar karrierën në sistemin e drejtësisë në vitin 1996 dhe ka punuar si prokuror në Elbasan dhe Durrës, përpara se të emërohej në Prokurorinë e Beratit në vitin 2008. Gripshi u shkarkua nga detyra në vitin 2010 me dekret të Presidentit të kohës me motivacionin e “sjelljeve që diskreditojnë figurën e prokurorit”, por ai fitoi më pas një proces gjyqësor kundër vendimit të shkarkimit dhe u rikthye në detyrë në vitin 2015.
