Policia e Tiranë ka reaguar në lidhje me aksionin e mesnatës së djeshme, ku po transportoheshin armë zjarri me një automjet tip “BMW”, që dyshohet se i përkisnin një grupi kriminal.
Blutë e kryeqytetit bëjnë me dije se janë arrestuar pesë persona, të cilët po trafikonin armë zjarri nga Shkodra drejt Tiranës. Në kuadër të operacionit policor të koduar “Repishti”, janë vënë në pranga shtetasit:
Sabian Hasaj, 22 vjeç, Redi Nika, 18 vjeç, Denisa Halilaj, 22 vjeçe, Denis Hasaj, 18 vjeç, dhe Mirjan Hasaj, 26 vjeç, të gjithë banues në Malësi të Madhe. Ata janë kapur në një parking në Rrugën e Rinasit.
Autoritetet policore raportojnë se uniformat blu kanë lokalizuar automjetin tip “BMW” me drejtues shtetasin Mirjan Hasaj. Gjatë kontrollit të automjetit dhe në një valixhe në bagazh, u gjetën dhe sekuestruan në cilësinë e provës materiale 9 armë zjarri (4 automatikë dhe 5 pushkë) me krëhër e municion luftarak.
Sipas Policisë, nga verifikimet e kryera ka rezultuar se këta shtetas pasi i kishin siguruar armët në Shkodër, i kishin sjellë në Tiranë për ti shitur tek persona të tjerë.
Materialet i kaluan Prokurorisë së Tiranës për veprime të mëtejshme procedurale.
