Fusha e blertë është kthyer në një “arenë boksi” në ndeshjen e sotme të kampionatit të moshave U19 mes Partizanit dhe Vllaznisë e luajtur në “Arenën e Demave” në kryeqytet.
Në minutën e 90 të sfidës, me rezultatin që nuk ishte aspak në diskutim, pasi shifrat ishin 5-0 për të kuqtë, një përplasje në mesfushë degjeneroi në sherr masiv. Gjeta i Partizanit goditi me grusht një lojtar të Vllaznisë dhe kjo solli reagimin e lojtarëve të tjerë të kuqebluve.
Kështu nisi një sherr ku u përfshinë të dy ekipet dhe që u ndal me vështirësi nga stafet teknike të dy skuadrave dhe forcat e sigurisë. Në fund gjyqtari nxori 3 nga kartonë të kuq për secilën skuadër duke larguar nga fusha Lutajn, Malajn dhe Gjetën nga Partizani si dhe Lekajn, Zymerin e Kubazin nga radhët e Vllaznisë.
Sa i përket ndeshjes, takimi ka nisur në mënyrën më të keqe të mundshme për djemtë e drejtuar nga trajneri Vioresin Sinani. Në minutën e 4-të ka qenë futbollisti Malaj ai që ka kaluar në avantazh të kuqtë. Dhe po ky futbollist do të shënonte edhe golin e dytë në minutën e 17-të.
Pjesa e parë do të mbyllej në shifrat 2-0 për Partizani U19. Në të dytën pritej një reagim i kuqebluve, por në fakt nuk ka ndodhur kështu, madje gjërat janë përkeqësuar për ta.
Kjo sepse vendasit kanë shënuar edhe tre gola të tjerë me anë të futbollistit Sogjani, shkodranit Nebi Qokthi dhe Sulos dhe në këtë mënyrë i gjithë takimi do të mbyllej me shifrat 5-0 në favor të Partizani U19.
