Nga Boldnews.al
Çdo paudhësi të qeverisë sonë, ne qytetarët nuk e marrim vesh asnjëherë të parët, por do dalë në ndonjë media botërore. Askush nuk e dinte përveç njërit, kryesorit më të madhit dhe të shumëpushtetshmit se Ishulli i Sazanit do kthehet në një resort të madh turistik dhe do falet nga vetë Edi Rama.
Ai që do e marrë është dhëndri i Donald Trump, ish-presidenti amerikan dhe aktualisht kandidat për president. Me një të rënë lapsit, Rama siguroi personalisht dy të mira; para dhe mbështetje politike, atje në majë të botës, sepse pas biznesit vijnë edhe kulisat e politikës që të japin shumë pushtet.
“Ishulli i Sazanit është një nga vijat bregdetare më të pacenuara dhe unike që kam parë kudo në botë,”- tha pak ditë më parë Jared Kushner, dhëndri i Trump, teksa me çiltërsi e konfirmoi faktin se kumbar na paska qenë Richard Grenell, këshilltar i Trump. Gjithçka ishte gatuar një vit më parë dhe këtu përveç atij që e shet, e fal dhe bën gropë septike një ishull, askush nuk e dinte.
Po çfarë është Ishulli i Sazanit që Rama e fali për vila e turizëm elitar dhëndrit të Trump? Sipërfaqja e ishullit është 5.7 kilometër katrorë dhe shtrihet në hyrje të Gjirit të Vlorës, por interesante është se janë plot 15 kilometra vijë bregdetare, herë me masive shkëmbore e herë me gjire plazhesh. Mbi të ka plot histori, legjenda, ushtri pushtuese që e synuan, gjak i derdhur për ta çliruar dhe lakmi për ta pasur.
Ajo ka shërbyer si bazë ushtarake deri në fund të viteve ‘90. Aty kanë jetuar deri në 10 mijë persona, kryesisht ushtarakë dhe familjarë të tyre. Edhe pse është zonë e mbrojtur, për Ramën kjo nuk ka asnjë vlerë, pasi është ai që i zhbën sa herë ka interes personal. Ligji për “investime strategjike” dhe ndryshimet e fundit të ligjit për “zonat e mbrojtura” janë specifikisht armë shfarosëse në duart e kreut të qeverisë i cili mund të falë, shesë, tjetërsojë apo shkatërrojë çdo objekt, hapësirë, det, lum, mal, pyll apo ishull.
Dhe vjen një ditë… Ditë korriku 2023, Edi Rama priti vajzën e Trump Ivankën, bashkëshortin e saj biznesmenin Jared Kushner dhe padyshim Grenëllin që i shoqëronte dhe bëri ndërmjetësin me Ramën që si ‘dhuratë të vogël’ u fali Ishullin e Sazanit. Po, kaq mjafton dhe kur kjo ide ishte gatuar një ditë e verës së kaluar këtu merret vesh vetëm pasi vetë Kushner shprehet se do të investojë rreth 1 miliardë dollar në Ishullin e Sazanit dhe në Zvërnec.
Ideja e çmendur që ishullin ta kthejë në mejhane moderne, ku “defekohet në hale ari”, lindi në korrik të vitit të kaluar. Një foto e postuar atëkohë i japim kuptim sot pasi vajza dhe dhëndri i Trump nuk ishin për pushime, por mundësi investimi që ia jep një “pushtues” i pasurive të shtetit.
“Kënaqësi të prisnim në muze Kryeministrin e Shqipërisë, z Edi Rama, Ivanka Trump dhe bashkëshortin e saj, Jared Kushner, të cilët vizituan Muzeun Kombëtar të Përgjimeve “Shtëpia me Gjethe”, thuhej në postimin e Muzeut një vit më parë.
Interesante janë edhe emërtimet e zonave të veçanta në Ishullin e Sazanit. Në anën perëndimore, gati në mes të tij, formohet ‘Gryka e Xhehenemit’, që është një gji i vogël, por i hapur dhe i thellë. Në bregun lindor formohet Gjiri i Shënkollës, ku është ndërtuar edhe porti detaro-ushtarak i ishullit dhe në jug të tij shtrihet Gjiri i Japrakut, aty ku gjendet edhe Plazhi zallor i Admiralit. Kur pasurinë e trajton si “Japrak me gjethe rrushi nga kodrinat e Surrelit”, dhe e quan veten “Admiral”, në Sazan ka edhe një emërtim tjetër “Gryka e Xhehenemit”…!
