Gjykata e Tiranës ka liruar ditën e hënë nga burgu Liam Osmanin, ose i njohur ndryshe nga publiku si Liam Mandiaro, pasi ka pranuar kërkesën e tij për rishikimin e vendimit penal të formës së prerë për shkak se procesi ishte bërë në mungesë të tij dhe pa dijeni të plotë të tij.
Liam Mandiaro (Osmani) u arrestua më 3 Mars, brenda shtëpisë së “Big Brother VIP”, duke mos qëndruar as 24 orë si banor i ri brenda asaj shtëpie, pasi pasi Gjykata e Tiranës e kishte dënuar në maj të 2022-tës me 2 vjet e 6 muaj burgim për veprën penale të “mashtrimit”. Sipas autoriteteve, ai ka përvetësuar 17 bileta turistike për në Gjermani në vitin 2019, për të cilat nuk ka kryer pagesat përkatëse.
Tashmë, çështja do të filloj nga e para dhe do të shqyrtohet nga një tjetër gjyqtar. Bashkë me shqyrtimin është vendosur edhe pezullimi i ekzekutimit të vendimit të parë dhe rrjedhimisht dhe lirimi i menjëhershëm nga burgu i Liam Mandiaros (Osmanit).
Procesi do të nis nga fillimi me Liam Osmanin në gjendje të lirë, i cili do të ketë mundësi të paraqitet në seancat gjyqësore, të mbroj veten dhe të ketë dijeni të plotë për gjyqin.
Ndërkohë, produksioni i Big Brother VIP ka lajmëruar se Liam Mandiaro (Osmani) do të jetë pjesë e spektaklit të sotëm, ku siç duket do të japë sqarimet e tij në lidhje me këtë ngjarje.
