Grupi Parlamentar i Partisë Demokratike ka depozituar në Kuvend një nisme ligjore që synon rritjen e pensioneve minimale.
Ligjvënësit demokratë kërkojnë rritjen progresive të pensioneve derisa në vitin 2029 të arritët një pension minimal prej 300 euro.
Ndërhyrja në ligj synon që “të vendosë një standard minimal për masën e përfitimit të pensionit në vendin tonë, pavarësisht llojit të këtij pensioni, duke filluar nga viti 2024 në masën e pensionit mesatar rreth 18 mijë lekë dhe duke vijuar në progresion rritës për 5 vitet e ardhshme, me qëllim që në vitin 2029 të mos ketë pensione më të ulëta se 32 mijë leke (rreth 300 euro)”.
Sipas deputetëve demokratë, me këtë nismë synohet “trajtimi dinjitoz i një prej shtresave më vulnerabël të vendit” dhe kjo sipas tyre, “është një tregues i një shoqërie të emancipuar, në paqe sociale dhe ku vlerësohet drejt puna dhe sakrificat shumëvjecare të bashkëqytetarëve tanë”.
Kjo masë përfitimi është pothuajse e barabartë dhe në disa raste më e ulët se përfitimet që kanë pensionistët në vendet e rajonit, si Kosova (309 euro), Mali i Zi (425 euro), Maqedonia e Veriut (320 euro) dhe Serbia (390 euro), shprhen deputetët demokratë në kërkesën e depozituar në Kuvend.
Sipas tyre, qeveria shqiptare i ka mundësitë financiare për të përballuar këtë kosto financiare, “nëse fondet e saj nuk do t’i alokojë për mobilime zyrash, blerja makinash, karburant (konkretisht ulja me 25% e shpenzimeve operative të qeverisjes qendrore), si dhe tendera e koncesione që pasurojnë oligarkët, por që mbështesin shtresën e pensionistëve për t’u ushqyer më mirë, për t’u kujdesur për shëndetin dhe për të përballuar kostot e jetesës”.
