Një episod i shëmtuar ndodhi në fund të prononcimit të kryeministrit Edi Rama për gazetarë, këtë të martët. Kreu i qeverisë shtyu gazetaren Ambrozia Meta.
Rama u ndal pas mbledhjes me drejtuesit e qarqeve në selinë e PS, në një prononcim për mediat. Interesi i gazetarëve u fokusua kryesisht te projekti që kompania e drejtuar nga dhëndri i Donald Trump ka shfaqur për ishullin e Sazanit. Protagoniste e pyetje për çështjen ishte gazetarja Ambrozia Meta. Pyetje të cilave Rama iu përgjigj shpesh me arrogancë dhe prepotencë, duke përdorur shprehje si “injoranca nuk është argument”.
Kulmi i sjelljes prej cubi u pa në fundin e deklaratës. Teksa Rama flet për të mirat, sipas tij, të projektit të Portit të Durrësit, gazetarja Meta i thotë se “aty nuk ka investim, por po shiten pallatet në gropë”.
“Shko shifi”, i përgjigjet Rama, teksa zgjat dorën e djathtë në fytyrën e gazetares dhe e shtyn, duke u larguar.
“Ju lutem mos më prekni më”, i drejtohet gazetarja Ambrozia Meta.
Në këtë mënyre, u mbyll prononcimi me gazetarët.
Kjo nuk është hera e parë që kreu i qeverisë Edi Rama bën të tilla sjelle të pahijshme me gazetarët.
Ndërkohë, organizata ndërkombëtare të lirisë së medias kanë vlerësuar në mënyrë periodike përgjatë viteve të fundit, një përkeqësim të lirisë së medias, nën qeverisjen Rama.
Organizatat e medias dhe opozita dënojnë sjelljen e Ramës
Veprimi i kryeministrit Edi Rama u dënua nga organizatat e mediave dhe eksponentë të opozitës.
“Akt i shëmtuar prej gangsteri”, e cilësoi kryetari i PD-së, në një reagim në rrjetet sociale, veprimin e kreut të qeverisë.
“Dhunë fizike e Edi Ramës ndaj gazetares së mirënjohur Ambrozia Meta. Dënoj me ashpërsinë më të madhe këtë akt të shëmtuar. Krim”, shkroi Berisha.
Deputeti i PL-së Petrit Vasili e ka cilësuar “kafshërore” sjelljen e kreut të qeverisë.
“Sjelljet kafshërore të Edi Rames s’kanë të ndalur. Rama, ky i çmendur, shtyn me duar dhunshëm gazetaren Ambrozia Meta sepse e pyet për hajdutërinë e tij me Portin e Durrësit. Po si mund të jetë kryeministër një ordiner i tillë që sillet për faqe të zeze. Ky e ka mbushur kupën dhe duhet të shtyhet dhe duhet përzënë me forcë e siç e meriton sjella e tij kafshërore”, shprehet ligjëvënësi përmes një reagimi në rrjetet sociale.
Unioni i Gazetarëve Shqiptarë tha në një deklaratë se Rama përdori “një gjuhë intimiduese dhe me cënim të etikës, deri në cënim të integritetit fizik të gazetares”.
“Unioni i Gazetarëve Shqiptarë reagon ndaj replikave të Kryeministrit Edi Rama me gazetaren Ambrozia Meta, e cila në të drejtën e vet profesionale këmbëngulte për një përgjigje konkrete prej kryeministrit, në konferencën për shtyp me gazetarët në datën 19 Mars 2024. Kryeministri jo vetëm që nuk jepte një përgjigje konkrete për pyetjen specifike, por me një gjuhë replikuese dhe nga pozita e edukuesit moral shmangej nga detyrimi për të dhënë një shifër konkrete për përfitimet e mundshme publike prej njerit nga projektet më të mëdha në fushën e turizmit shqiptar. Refuzimi dhe shmangia e Kryeministrit për përgjigje konkrete u bashkëshoqërua me një gjuhë intimiduese dhe me cënim të etikës, deri në cënim të integritetit fizik të gazetares. Unioni i Gazetarëve Shqiptarë reagon ndaj këtij momenti dhe shpreh solidaritetin me kolegen Meta, e cila spikat si reportere kurajoze në kërkim të fakteve dhe të dhënave që synojnë transparencë publike dhe llogaridhënie prej qeverisësve”, thuhet në reagim.
Edhe organizata për sigurinë e gazetarëve “Safe Journalists Albania” shprehu solidaritet me gazetaren që sipas organizatës, “u përball me intimidimin e kryeministrit vetëm pse po kërkonte transparencë dhe llogaridhënie”.
Lexo edhe: Shtyu gazetaren, Rama nuk pranon të kërkojë falje: Agresion imagjinar
