Ambasada amerikane në Tiranë dhe delegacioni i BE kanë reaguar lidhur me mirëkuptimin e arritur mes mazhorancës dhe opozitës për rikthimin e normalitetit në Kuvend.
Ambasada e Shteteve të Bashkuara në Tiranë shprehet se është e inkurajuar nga njoftimi për rikthimin e rendit normal në Parlament.
“Institucionet funksionale janë thelbësore për çdo demokraci të shëndetshme dhe anëtarët e zgjedhur duhet të ushtrojnë detyrat dhe përgjegjësitë e tyre në mirëbesim brenda Parlamentit”, thuhet më tej në një reagim publik të ambasadës në rrjetet sociale.
Një qëndrim të ngjashëm shprehu dhe delegacioni i BE-së në Tiranë
“Mirëpresim lajmin për rikthimin e normalitetit në Parlament. Siç kemi thënë dhe më parë, një parlament që funksionon mirë është thelbësor për të lehtësuar rrugën e Shqipërisë drejt anëtarësimit në BE, i cili është objektivi strategjik i vendit, i mbështetur nga shumica dërrmuese e shqiptarëve”, thuhet në reagim.
