Vrasja e ndodhur në Shënavlash të Durrësit vijon të mbetet e rrethuar nga misteri, teksa dëshmitë me protagonistëve nuk përputhen me gjetjet e grupit hetimor.
Më 23 shkurt, policia e Durrësit njoftoi arrestimin e 19-vjeçares Hygerta Meta, për vrasjen e të atit, 49-vjeçarit Pëllumb Meta. Vajza pranoi kryerjen e krimin dhe groposjen e të atit në kasollen pranë banesës, ndërsa si shkak pohoi se ka qenë nxitja prej babait për t’u fejuar pa dëshirën e saj, si dhe konfliktet familjare që kanë patur. Megjithatë, dëshmia e të resë nuk bindi hetuesit, që arritën më vonë në përfundim se nuk ishte Hygerta ajo e cila kishte shkrepur armën, por vëllai i madh.
Ky i fundit, më 13 Shkurt, kishte bërë kallëzim për zhdukjen e të atit. Hysen Meta u arrestua si ekzekutori dhe planifikuesi i vrasjes së babait. Planifikimin, sipas policisë, e bëri bashkë me të motrën. Përveç tyre, në pranga u vu edhe vëllai i vogël Amarildo, i cili sipas hetuesve, ndihmoi në hapjen e gropës dhe veprime të tjera që penguan në zbardhjen e së të vërtetës, si zhvendosja e makinës së viktimës nga shtëpia në Shënavlash në aksin rrugor Shënavlash-Sektor Rinia, ku edhe u gjet i braktisur nga policia. Ndërsa e ëma e fëmijëve dhe bashkëshortja e viktimës, Blerina Meta po hetohet në gjendje të lirë.
Dëshmitë
Versioni i hetimeve parapake megjithatë nuk pranohet nga protagonistët. Hygerta vijon të këmbëngulë se ka qenë ajo e cila ka qëlluar të atit. Ndërsa vëllai i madh Hyseni, pasi pohoi vrasjen para policisë, mohoi në gjykatë të jetë ai që ka vrarë babanë, siç akuzohet nga policia e prokuroria.
Me skepticizëm nga të afërmit e viktimës është parë dhe roli i bashkëshortores së tij. E motra dhe i vëllai i Pëllumb Metës kanë akuzuar publikisht Blerina Metën, se ka qenë ajo e cila i ka shtyrë fëmijët drejt krimit. Kjo e fundit ndërkohë, ashtu si dhe fëmijët dhe i ati (vjehrri i viktimës), e kanë përshkruar viktimën si njeri të dhunshëm dhe shumë autoritar në familje.
Shkaku
I paqartë mbetet edhe shkaku i vrasjes. Hetimet kanë rrëzuar pretendimet e vajzës se i ati donte ta fejonte me zor. Në këtë pikë bazohen në një dëshmi të dhënë nga familja e cila kishte kontaktuar për mblesëri me Pëllumb Metën. Ky i fundit, thuhet në dosjen hetimore, u kishte thënë të interesuarve se vajza do të duhet të vazhdonte shkollën dhe se fejesë nuk do të kishte. Për grupin hetimor, si shkak i krimit qëndrojnë konfliktet në familje, që siç dëshmojnë djemtë, vajza dhe bashkëshortja e viktimës, kishin me kryefamiljarin. Një tjetër dyshim është një konflikt i mundshëm që djali i madh mund të kishte me të atin, për tokat që kryefamiljari kishte në posedim.
Të rejat
Burime pranë grupit hetimor thasë se prokuroria ka kryer një eksperiment hetimor, në një poligon në Xhafzotaj në Durrës. Tre fëmijët e viktimës (që po hetohen nën masën e arrestit me burg) dhe e shoqja, janë dërguar për të kryer qitje.
Vetëm vajza Hygerta Meta ka bërë qitje, ndërsa gruaja dhe 2 fëmijët e tjerë nuk kanë pranuar të qëllojnë me armë, duke deklaruar se nuk dijnë ta përdorin. Hygerta, ndërkohë, ka qëlluar disa herë me pistoletë në poligon.
Ndërkohë, nga ekspertiza e kryer me armën e krimit, u gjetën gjurmë gishtërinjsh të djalit të vogël të familjes, Amarildos, në qesen që ishte mbeshtjellë ajo. Në armën e krimit rezulton se gjurmët ishin fshirë.
Hygerta Meta është rikthyer nga hetuesit në banesën ku ka ndodhur krimi, ku ka dhënë sërish shpjegime për hetuesit, ndërsa për grupin hetimor, ekzekutori vijon të mbetet djali i madh, Hyseni.
Banesa ku ndodhi vrasja
