Vrasja e 49-vjeçarit, Pëllumb Meta në fshatin Shënavlash të Durrësit vijon të jetë në sitën e hetimeve teksa detaje të reja dalin në dritë.
Nga hetimet e deritanishme rezulton se autorë të ngjarjes janë tre fëmijët e tij, Hysen, Amarildo dhe Hygerta Meta, por Prokuroria e Durrësit ka kryer një eksperiment hetimor për të zbardhur dinamikën e plotë të ngjarjes.
Tre fëmijët e familjes Meta, bashkë me mamanë e tyre janë dërguar në një poligon qitjeje për të provuar nëse dinë të përdorin armë apo jo.
Sipas të njëjtave burime, mësohet se nga ky eksperimenti është provuar se të tre fëmijët dhe mamaja e tyre dinin që të përdorin armë.
Ky eksperiment hetimor është ndërmarrë për të përcaktuar se cili prej tyre qëlloi me 4 plumba në drejtim të Pëllumb Metës për shkak të dëshmive kontradiktore që kanë dhënë fëmijët gjatë hetimeve paraprake.
Sakaq policia po verifikon gjithashtu edhe rolin e bashkëshortes së viktimës, e cila po hetohet në gjendje të lirë, kurse 3 fëmijët; Hyseni, Hygerta dhe Amarildo Meta janë nën masë sigurie arrest në burg për vrasjen e babait.
