Ka nisur pritja nga kryeministri Edi Rama në tapetin e kuq të liderëve që do të marrin pjesë në samitin Bashkimi Europian-Ballkani Perëndimor që do të mbahet ditën e sotme në Pallatin e Kongreseve në Tiranë.
E para që ka mbërritur ka qenë Majlinda Bregu, e cila mban postin e sekretares së Përgjithshme për Bashkëpunimin Rajonal. Më pas kanë ardhur dhe liderët e tjerë, mes të cilëve dhe kryeministri shqiptar i Maqedonisë së Veriut Talat Xhaferi.
Samiti i sotëm synon rritjen ekonomike të rajonit, përshpejtimin e reformave të duhura, dhe kryerjen e investimeve, që mund të avancojnë procesin e zgjerimit të BE-së me këto vende. Një samit i ngjashëm për këtë plan u mbajt më 22 janar në Shkup të Maqedonisë së Veriut.
Plan i ri për rritje ekonomike në vendet e Ballkanin Perëndimor, i miratuar nga Komisioni Evropian, më 8 nëntor të vitit 2023, është i bazuar në katër shtylla.
- Shtylla e parë është “forcimi i integrimit ekonomik në tregun unik të BE-së”
- Shtylla e dytë e këtij plani është “forcimi i integrimit ekonomik brenda Ballkanit Perëndimor përmes tregut të përbashkët rajonal”
- Shtylla e tretë e këtij plani është “përshpejtimi i reformave fondamentale”
- Shtylla e katërt e planit të ri të Komisionit Evropian për rritje ekonomike në Ballkanin Perëndimor është “rritja e asistencës financiare për të ndihmuar reformat”. Këtu përfshihet edhe propozimi për 6 miliardë euro ndihmë.
Lisa e Pjesëmarrësve
1-Edi Rama – Kryeministër i Shqipërisë
2-Aleksandër Vuçiç – President i Serbisë
3-Borjana Kristo – Presidente e Këshillit të Ministrave të Bosnjes dhe Hercegovinës
4-Talat Xhaferi – Kryeministër i Maqedonisë së Veriut
5-Oliver Varhelyi – Komisioneri i BE-së për Zgjerimin
6-Majlinda Bregu – Sekretare e Përgjithshme për Bashkëpunimin Rajonal
7-Danijela Gacevic – Drejtuese në detyrë e CEFTA-s
8-Gert Jan Koopman – Drejtor i përgjithshëm i grupit negociator të KE për Fqinjësinë dhe Zgjerimin
9-Xiaoqing Yu – Drejtoreshë e Bankës Botërore për Ballkanin Perëndimor
10-Charlotte Ruhe – Drejtori menaxhues i BERZH-it për Evropën Qendrore dhe Juglindore
11-Matej Zakonjsek – Drejtor i Sekretariatit të Komunitetit për Transportin
12-Maja Pishkeviq – Qendra e Evropës në Këshillin Atlantik dhe përfaqësuese e qendrës në Ballkanin Perëndimor
13-Alessandro Bragonzi – Kreu i përfaqësimit rajonal për Ballkanin Perëndimor në Bankën Evropiane të Investimeve (EIB)
14-Lulzim Rafuna – Kryetar i Dhomës së Tregtisë së Kosovës
15-Ines Muçostafa – Kryetare e Unionit të Dhomave të Tregtisë dhe Industrisë së Shqipërisë
16-Andi Dobrushi – Drejtor Ekzekutiv i OSFA
