Një 21-vjeçar është arrestuar ditën e sotme në Mat pasi i është gjetur arsenal armësh.
Policia bën me dije se në pranga ka rënë shtetasi me iniciale R.R, pasi gjatë kontrollit në banesë i është gjetur 1 kallashnikov, 3 armë gjuetie, 1 pistoletë, fishekë, kapuça e maska që janë sekuestruar në cilësinë e provës materiale.
Sakaq ka nisur procedimi në gjendje të lirë për babain e të riut, shtetasin H.R, 56-vjeç.
Njoftimi i policisë:
Si rezultat i informacioneve të siguruara nga inteligjenca policore, për një 21-vjeçar që posedonte pa leje, në banesën e tij, armë zjarri dhe municion luftarak, shërbimet e Policisë kanë ndërhyrë menjëherë në këtë banesë dhe si rezultat kanë gjetur të fshehura: 1 kallashnikov, 3 armë gjuetie, 1 armë zjarri pistoletë, 114 fishekë dhe 2 kapuça në formë maske, të cilat u sekuestruan në cilësinë e provës materiale. Në vijim të veprimeve procedurale për këtë rast, u kap në flagrancë dhe u vu në pranga shtetasi R. R., 21 vjeç, banues në fshatin Karicë, njësia administrative Baz. Gjithashtu, u referuan materialet në Prokurori ku nisi procedimi në gjendje të lirë për babain e 21-vjeçarit, shtetasin H. R., 56 vjeç.”
