Një 32-vjeçar është arrestuar nga policia në Gjirokastër pasi është kapur duke transportuar emigrantë të paligjshëm, kundrejt pagesës. Blutë bëjnë me dije se i riu është kapur në vendin e quajtur “Virua, teksa ishte duke transportuar me furgon 16 emigrantë nga Vendet e Treta me qëllim kalimin e kufijve.
Sakaq është shpallur në kërkim i vëllai i tij, i cili është bashkëpuntor në këtë veprimtari kriminale.
“Si rezultat i hetimeve të ndjekura nën drejtimin e Prokurorisë Gjirokastër dhe të veprimeve të tjera operacionale të kryera në kuadër të megaoperacionit “Sundimi i ligjit”, për të zbardhur autorësinë e një rasti të transportimit të emigrantëve, kundrejt pagesave (rast i goditur nga Policia e Gjirokastrës, më datë 10.03.2022, në kuadër të operacionit “Road Guard”), shërbimet operacionale dhe ato për Hetimin e Trafiqeve të Paligjshme të DVP Gjirokastër vunë në pranga shtetasin B. Q., 32 vjeç dhe shpallën në kërkim shtetasin K. Q., 31 vjeç, vëllezër, të dy banues në Tepelenë.
Këta 2 shtetas, dyshohet se në bashkëpunim me shtetasin S. S. (të arrestuar më datë 05.05.2022), më datë 10.03.2022, në vendin e quajtur “Virua”, kanë braktisur furgonin me të cilin transportonin kundrejt pagesave, 16 emigrantë nga Vendet e Treta, në mënyrë që ata të kalonin ilegalisht kufijtë.
Punohet për lokalizimin dhe ndalimin e 31-vjeçarit”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
