Pesë persona janë proceduar në Korçë pasi janë kapur në flagrancë duke vënë baste sportive.
Blutë bëjnë me dije se rastet e kësaj veprimtarie të paligjshme janë konstatuar në lagjet nr. 1 dhe 6 të qytetit. Sakaq janë sekuestruar në cilësinë e provës materiale disa celularë dhe shuma parash që dyshohet se mund të jetë fituar nga kjo veprimtari e paligjshme.
“Specialistët për Hetimin e Krimeve të Komisariatit të Policisë Korçë referuan materialet në Prokurori ku filloi procedimi në gjendje të lirë për shtetasit:
-P. N., 28 vjeç, F. M., 30 vjeç dhe J. Ç., 30 vjeç, banues në Korçë, pasi në lagjen nr. 6, gjatë kontrollit të ushtruar në lokalin e 28-vjeçarit u kapën duke vënë baste sportive nëpërmjet celularëve.
Nga verifikimet e kryera rezultoi se 28-vjeçari e ushtronte aktivitetin në këtë subjekt, pa licencë dhe i paregjistruar në organet tatimore;
-R. R., 29 vjeç, banues në Korçë, pasi në lagjen nr. 6, gjatë kontrollit të ushtruar në një lokal, u kap duke vënë baste sportive nëpërmjet celularit;
-S. L., 32 vjeç, banues në Korçë, pasi në lagjen nr. 1, gjatë kontrollit të ushtruar në lokalin në përdorim të tij, shërbimet e Policisë gjetën në celularin e tij, biseda dhe aplikacione për vënien e basteve sportive”,- njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
