Të gjithë tashmë jemi “sy e veshë” nga dueli i ditës së premte, ku Partizani dhe Tirana do të përplasin “brirët” mes tyre në derbin e 3-të të këtij sezoni.
Derbi i fundit u mbyll në barazim 1-1, teksa derbi i parë i këtij sezoni ka shkuar në favorin e të kuqve me shifrat 2-1.
Të premten ashtu si gjithmonë pritet një duel i luftuar me spektakël në fushë dhe në shkallët e stadiumit.
Një ish i madh i kësaj sfide është Orges Shehi, i cili vetëm në fund të vitit të kaluar ndau rrugët me gjyq me bardheblutë, ndërsa vendosi të kalonte në krahun tjetër të kryeqytetit.
Tashmë trajneri durrsak do të synojë të sigurojë fitoren e parë në derbin e parë kundër Tiranës.
Nëse Shehi arrin të marrë 3 pikët kundër bardhebluve në “Air Albania” atëherë do të bëhej trajneri i dytë që fiton derbin e kryeqytetit me të dyja ekipet. I pari që e ka bërë diçka të tillë është Suljeman Starova.
“Bobi” ka luajtur me të dyja ekipet dhe ia ka dalë të fitojë derbin po me të dyja skuadrat. Një trajner tjetër që ka drejtuar të dyja ekipet është Ilir Daja, por ky i fundit nuk e ka mposhtur dot Partizanin.
