Trajneri i Liverpool-it, Jurgen Klopp, ka reaguar pas kritikave ndaj Mohamed Salah, i kritikuar për largimin nga grumbullimi i kombëtares dhe kthimin në Angli gjatë Kupës së Afrikës.
Duke folur për mediat pas fitores së Të Kuqve ndaj Fulhamit, Klopp pohoi se Salah nuk donte të vononte trajtimin për dëmtimin e tij dhe kështu u rikthye menjëherë.
Ai shtoi se ylli i Liverpoolit ishte i prirur të kthehej në ekipin kombëtar nëse ata ishin ende në turne kur ai të rikuperonte formën.
Trajneri gjerman tha:
“Egjipti dhe Liverpooli kanë të njëjtin interes, ne duam që Mo Salah të rikuperohet sa më shpejt të jetë e mundur. Nëse ai qëndron në Afrikë dhe ata nuk mund të bëjnë trajtimin e duhur, kjo thjesht do të vonojë gjithçka, veçanërisht për Egjiptin nëse ata përparojnë.
“Ne e sjellim atë këtu jo sepse duam ta largojmë nga Egjipti, por thjesht për të ofruar trajtimin më të mirë mjekësor. Kemi rënë dakord për gjithçka. Nëse Salah rikuperon dhe Egjipti shkon në finale, do t’i bashkohet kombëtares”.
Mohamed Salah shënoi në ndeshjen e parë të Kupës së Afrikës për të ndihmuar Egjiptin të marrë një barazim kundër Mozambikut. Megjithatë, ai u largua pas pjesës së parë në ndeshjen e dytë kundër Ganës, e cila gjithashtu përfundoi në barazim.
