Adis Dazdareviç, një zyrtar i lartë dhe kandidat për këshilltar komunal i Aleancës Boshnjako-Serbe në zgjedhjet e fundit lokale në Novi Pazar të Serbisë, është arrestuar ditën e djeshme.
Sipas raportimeve nga mediat loakle, ai dyshohet se ishte pjesë e një rrjeti spiunazhi në territorin serb të organizuar nga një person me inicialet D.R., i cili po ashtu u arrestua policia serbe dy javë më parë si i akuzuar për veprën penale të spiunazhit, për llogari të Shqipërisë.
Dazdareviç dyshohet se merrte direktivat nga D.R. për mbledhjen e të dhënave dhe informacioneve të rëndësishme për shërbimin inteligjent të Shqipërisë, në këmbim të shumave monetare.
Sipas autoriteteve serbe të dhënat e mbledhura nga Dazdareviç i janë dorëzuar DR-së, e cila më pas ky i fundit ua ka dërguar shërbimeve inteligjente të Shqipërisë dhe Kosovës, shërbim për të cilin është paguar.
Gjatë kontrollit të lokalit që ka përdorur Dazdareviç janë gjetur një sërë sendesh që sipas autoriteteve serbe, kanë të bëjnë me kryerjen e veprës penale së spiunazhit. Atij i është caktuar masa e ndalimit deri në 48 orë, gjatë së cilës do të paraqitet para prokurorit sipas kallëzimit penal të BIA-s.
