Analisti Andi Bushati duke folur në edicionin e lajmeve në MCN TV e konsideroi si të ekzagjeruar zhurmën e opozitës mbi reformën zgjedhore, duke shtuar se edhe me ligjin më të mirë elektoral nuk do të pengohej vullneti i mazhorancës për të vjedhur zgjedhjet. Bushati tha se nëse Edi Ramës i preket ekzistenca e pushtetit, nuk pyet më as për ndërkombëtarët.
Duke folur mbi sulmin me vezë ndaj Vangjel Dules, Bushati tha:
“Nuk kemi asnjë fakt se kush e ka qëlluar. Duhet pranuar që në Shqipëri ka një sentiment nacionalist anti-grekë. E vetmja gjë që më bën përshtypje është fakti, që e mbani mend kur aktivistë të Arlind Qorit kanë goditur me vezë nga Rama te kryeparlamentarja, i ka marrë policia dhe i ka future në burg. Në një demokraci të lënë të lirë, e shumta do i paguash pastrimin e xhaketës në pastrim kimik. Ndërsa në Shqipëri kemi dy standarde, ndryshe kur qëllohet qeveria, ndryshe kur qëllohet një pjesëtar i opozitës”.
Duke folur mbi të ashtuquajturën reformë zgjedhore, analisti u shpreh:
“Këta të OSBE-ODIHR janë bërë qesharak. Kanë tre dekada që bëjnë reforma në Shqipëri dhe zgjedhjet vidhen njësoj. Një reformë më shumë s’domethënë asnjë gjë. Edhe zhurma e opozitës është pak e ekzagjeruar. Është e drejtë sepse po i bëhet një padrejtësi, por edhe po mos t’i bëhej padrejtësi në fund do kishim një ligj si ta donte Rama reformën. Por edhe ligji më i mirë nuk pengon dot vullnetin e dikujt që niset për t’i vjedhur zgjedhjet. Edhe sikur Alibeaj të zëvendësohej me Gaz Bardhin, edhe sikur Berishës t’ia linin ta shkruante vet ligjin elektoral, kjo s’do ndryshonte gjë në 2025-ën. A ka ndonjë shqiptarë që mund të besojë që sido të shkruhet ligji elektoral Rilindja s’do përdorë administratën dhe patronazhistët, dhe që ata s’do blejnë vota. E gjithë zhurma që bëhet rreth reformës elektorale është zero. Opozita mundet së paku të minimizojë vjedhjen që do t’i bëhet. Jemi prapë në pikën e një situate groteske qesharake. Ne kemi forcën më të madhe të opozitës që s’i jepet vula dhe komisionerët. 600 mijë qytetarë shqiptarë janë të panjohur nga sistemi ynë elektoral. Në kushtet kur forca më e madhe e opozitës nuk konkurron dot në kushte të barabarta, të flasësh për konsultim publik kush është më e mira, është njësoj si të diskutosh në një fshat që digjet për seksin e engjëjve”.
Pyetjes, a do ta pranojnë ndërkombëtarët reformën Rama-Basha, Bushati iu përgjigj:
“Unë e shtroj pyetjen: A i pyet më kush ndërkombëtarët?! Rama e mori marrëveshjen e 5 qershorit, e përmbysi, e bëri të njëanshëm ndryshimin e rregullave të lojës, ndërkombëtarët dhe Bundestagu gjerman arritën deri aty sa të thoshin po bëre këtë hap s’të hapen negociatat, Rama e bëri dhe të gjitha u harruan. Ne jemi në kushtet e një regjimi që s’përplaset me ndërkombëtarët, por kur preket ekzistenca e pushtetit të tij nuk pyet as për ndërkombëtarët”.
