Ekspertja për çështjet ndërkombëtare, Ilda Zhulali tregoi se, sot në Samitin e mbajtur në Shkup nga Bashkimi Europian për Ballkanin Perëndimor, Shqipëria humbi sërish një shans për t’u paraqur përpara BE-së si një vend serioz.
Zhulali tha se kryeministri Rama në vend që të prezantohej me një plan investimesh dhe reformash për Shqipërinë, ai gjeti mundësinë të shënjestrojë Greqinë.
Sipas Zhulalit, Rama tregoi sërish paaftësinë e tij për të qeverisur.
“Secili nga kryeministrat do të duhet që të shkonte aty me një listë reformash që do të synonte ti bënte, apo arritjesh të këtyre reformave bashkë me një plan të investimeve indikativ, çfarë kërkon nga BE-ja për të investuar në vendin e tij. Këtë gjë ne e pamë ta thoshte kryeministri i Kosovës, z.Kurti i cili sigurisht përfshiu edhe pika të tjera politike shumë të rëndësishme që lidhen me sigurinë e Kosovës dhe nuk mund të mungonin në fjalimin e tij.
Në fjalën e kryeministrit tonë ne nuk dëgjuam asgjë nga këto, përkundrazi ai gjeti vendin të shënjestronte një vend anëtar të BE, siç është Greqia, për të krijuar një alibi të llojit që krijon ai për të fshehur paaftësinë e vet qeverisëse dhe rrënimin që po çon vëndin tonë e pakënaqësinë që ka shkaktuar tek njerëzit.
Në këtë samit Shqipëria përsëri humbi një mundësi për të paraqitur veten në mënyrë serioze dhe për të shkuar me një plan serioz pranë BE.”, tha Zhulali per Syri tv.
