Bledi Çuçi ka mbledhur Grupin Parlamentar të Partisë Socialiste paraditen e kësaj të hëne, e cila vjen pak orë para nisjes së sesionit të ri të Kuvendit sot në orën 17:00
Mësohet se në fjalën e mbajtur para deputetëve, ai ka bërë një përmbledhje të sesionit të kaluar parlamentar, të cilin e ka cilësuar si atipik për shkak të qëndrimit të opozitës, duke anashkaluar faktin që asaj i mohoen të drejtat në Kuvend
Çuçi ka kërkuar nga deputetët e PS prezencë nëpër seanca për të mos cenuar kuorumin dhe votimet e ligjeve. Më tej ai u ka kërkuar deputetëve rritje cilësore të debateve në Parlament dhe pjesëmarrje aktive.
“Për këtë sesion dua sidomos edhe qasjen që duhet të ketë grupi ynë në lidhje me integrimin. Në kushtet kur kemi një axhendë evropiane tashmë, fokusi nuk është vetëm te qeveria, por edhe te institucionet e tjera kushtetuese. Ne si grup parlamentar në këtë sesion duhet të jemi instrument llogaridhënës i institucioneve të pavarura. Të krijojmë një mekanizëm që institucionet e pavarura të kenë një fokus të veçantë lidhur me rekomandimet që jep BE”, – tha Çuçi ndër të tjera.
Lidhur me seancën e sotme ai tha se pritet të kalojnë edhe dekretet për ministrat e rinj dhe prandaj pjesëmarrja në votim nuk duhet të mungojë.
