Është zbardhur dëshmia e dhënë në Polici e djalit të madh të të ndjerës Bedrie Loka, ku duket se me dëshminë e tij, vuri në pranga të atin, 45-vjeçarin Xhemal Loka.
Për blutë e Durrësit, djali i 41-vjeçares ka deklaruar se ajo dhunohej sistematikisht psikologjikisht dhe fizikisht nga Xhemal Loka, madje dhe se ky i fundit e ofendonte me fjalë mjaft të rënda.
“Babai në mënyrë sistematike ka dhunuar nënën fizikisht dhe psikologjikisht. Babai e ofendonte nënën me fjalët më të rënda të mundshme. Sipas tij ofendimet e babait ishin shumë të rënda për nënën”, ka deklaruar ai para oficerëve të policisë gjyqësore.
Ndërkohë një dëshmi e tillë bie ndesh me pretendimet Xhemal Lokës, i cili pretendon se e donte bashkëshorten e tij dhe se gjithçka ka ndodhur vetëm si pasojë e bullizmit në rrjetet sociale.
Nuk e kam dhunuar gruan. Bashkëshorten e kisha për shtëpi, nuk e çova drejt vetëvrasjes. Vetëvrasja e saj erdhi si pasojë e postimeve të TikTok-ut. Kemi pasur konflikte si çdo familje, por gruan e doja. E kam dashur si nënën e fëmijëve të mi. Në mëngjes kam parë që kishte pirë helm dhe e kam çuar me shpejtësi drejt spitalit të Durrësit për ta shpëtuar. Gruan time e dua dhe nuk e kam dhunuar” – mësohet se ka deklaruar 45-vjeçari.
Ndërsa lidhur me dëshmitë e fëmijëve të cilët kanë deklaruar se babai i tyre i bënte shantazh të vazhdueshëm nënës së tyre si dhe bisedat e kapura në celularë ku nuk mungojnë kërcënimet, Xhemal Loka burime për mediat nga Policia e Durrësit bëjnë me dije se ai ka preferuar të heshtë dhe nuk ka dhënë asnjë përgjigje.
Policia ka sekuestruar telefonin i tij celular që e kishte fshehur te motra e tij. Hetuesit kanë në duar veç telefonit të tij edhe atë të bashkëshortes së ndjerë, Bedrie Loka. Celularët janë dërguar për ekspertimin me qëllim gjetjen e provave për dokumentimin e rrethanave dhe shkakut të ngjarjes.
Blutë e qytetit bregdetar raportuan një ditë më parë se nga hetimet e thelluara rezultoi se më datë 27 dhjetor, Xhemal Loka e ka kërcënuar bashkëshorten me mjet prerës (thikë), për të vrarë, në prezencë të njërit prej fëmijëve. Gjithashtu, gjatë kontrollit të ushtruar në territorin e banesës së 45-vjeçarit, Policia gjeti dhe një armë zjarri automatik tip “Sharrs”, një krehër dhe një sasi municioni luftarak.
Kujtojmë se Bedrie Loka nga fshati Vardardhë i Sukthit, nënë e 4 fëmijëve i ka dhënë fund jetës më 2 Janar duke konsumuar fotoksinë, ku shkaku kryesor fillimisht ishte denigrimi në rrjetet sociale. Në emër të saj ishte hapur profile në Tik-Tok, që denigronin figurën e saj si grua, me etiketime si e pamoralshme. Dyshohet se profilin ia kishte hapur vajza e tezes, e cila ndodhej jashtë shtetit, ndërsa foton ia kishte dërguar një koleg në fasoneri i të ndjerës.
Por, pas dëshmive të fëmijëve dhe vëllezërve të Bedrie Lokës, u dyshua se mund të ketë qenë dhe bashkëshorti që e ka shtyrë drejt vetëvrasjes. Ky i funduit punonte me punë sezonale në Greqi.
