Deputetja e PD-së Ina Zhupa ka reaguar pasi deputetja e PS-së, Blerina Gjylameti në një intervistë televizivë i ka bërë thirrje opozitës që të mos humbin kohë dhe të bashkëpunojnë për reformën zgjedhore dhe t’u jepet mundësia diasporës për të votuar.
Në një postim në rrjetet sociale, Zhupa shkruan se është shumë e thjeshtë që të vazhdojë punën komisioni i reformës zgjedhore, mjafton që mazhoranca të zbatojë rreguloren dhe të mos caktojë anëtarët e opozitës në komision.
Teksa e konsideron si falsitet thirrjen e Gjylametit, deputetja demokrate shton më tej se ajo bashkë me Tonin Gogun janë dy propozuesit e rregullores së re antikushtetuese për përjashtimin me nga dy muaj të deputetëve.
Ina Zhupa i drejtohet Gjylametit që thirrjen t’ia bëjë vetes dhe kolegëve socialist që t’i kthehen kushtetutës dhe jo të ndryshojnë rregulloren sa herë e shkelin atë.
Reagimi i plotë:
Fallsiteti në thirrje ndërkohë që vetëm shkelin kushtetutën dhe përjashtojnë deputetët si një rekord i zi parlamentar.
E njëjta Gjylameti që na bën thirrje, bashkë me Toni Gogun janë dy propozuesit të rregullores së re antikushtetuese për përjashtimin nga funksioni i deputetit me dy muaj të kolegëve që prishin qetësinë e hajdutëve dhe kërkojnë zbatimin e kushtetutës.
Nuk u mjaftuan, që në harkun e tre muajve socialistët morën 64 vendime në 10 mbledhje të Sekretariatit të Etikës, për përjashtimin e 29 deputetëve meqë nuk pranojmë të jemi fasadë e seancave ku shkelet kushtetuta dhe nuk respektohen të drejtat kushtetuese. Por vazhduan me propozime antidemokratike dhe antikushtetuese.
Dhe mbasi bën këtë, na paska bërë thirrje për reformën zgjedhore. Është shumë e thjesht reforma, mjafton të zbatoni rregulloren, mos mbani peng komisionin, të votoni përfaqësuesit që kërkon opozita dhe të vazhdoj punën komisioni i reformës zgjedhore.
Por ju doni të caktoni ju përfaqësuesit tanë në komision dhe ne të rrimë mos ju prishim qetësinë e seancave antikushtetuese.
I keni bërë llogaritë gabim!
Thirrjen bëja vetes dhe kolegëve socialist që ti ktheheni kushtetutës dhe jo të ndryshoni rregulloren sa herë e shkelni atë, si në rastin e komisioneve online.
