Një 21-vjeçar, është proceduar penalisht këtë të premte, pasi akuzohet për prishje të qetësisë publike.
Blutë bëjnë me dije se i riu, bënte drift dhe manovra të rrezikshme me automjet dhe postonte videot në rrjetin sociale Tik-Tok.
Krahas procedimit, njoftohet se 21-vjeçarit i është bllokuar makina dhe është ndëshkuar me gjobë prej 40 mijë lekësh.
“Në lidhje me një video të publikuar në portalin “Tik-Tok”, në të cilën shfaqet një automjet duke kryer manovër të rrezikshme (drift), në bulevardin “Aqif Pasha”, sqarojmë se shërbimet e Komisariatit të Policisë Elbasan kanë kryer veprimet për identifikimin e drejtuesit të automjetit.
Drejtuesi i automjetit, shtetasi M. C., 21 vjeç, banues në Elbasan, është shoqëruar në Komisariat, bashkë me automjetin e tij”.
Në vijim të veprimeve, specialistët për Hetimin e Krimeve të Komisariatit të Policisë Elbasan referuan materialet në Prokurori ku nisi procedimi në gjendje të lirë ndaj shtetasit M. C., 21 vjeç, banues në Elbasan, për veprën penale “Prishja e qetësisë publike”.
Gjithashtu, nga specialistët e Policisë Rrugore iu vendos masa administrative 40 000 lekë, bazuar në nenin 139 të Kodit Rrugor. Automjeti u sekuestrua në cilësinë e provës materiale,– njofton policia.
