Deputetë dhe anëtarë të Partisë Demokratike janë mbledhur paraditen e kësaj të diele poshtë banesës së ish-kryeministrit Sali Berisha, në shenjë mbështetjeje ndaj tij.
Nënkryetarët Luçiano Boçi e Oerd Bylylykbashi mbajtën një deklaratë për mediat ku theksuan se mosbindja civile do të jetë edhe më e fortë në vitin që vjen.
“Sot është sulmuar jo thjesht Sali Berisha, jo thjesht opozita, por çdo qytetar, të cilëve u janë cenuar të gjitha vlerat që ka Shqipëria”, u shpreh ndër të tjera Boçi.
Ndaj tij dje GJKKO dha masën “arrest shtëpie” me mbikëqyrje policore për çështjen e privatizimit të ish-kompleksit “Partizani”, nën akuzën e korrupsionit.
Ndërkaq edhe anëtarët e Departamentit “Brain Gain” të Partisë Demokratike u mblodhën në mbrëmjen e së shtunës poshtë banesës së ish-kryeministrit dhe më pas ata janë ngujuar në sallën “Pjetër Arbnori” në seli, si shenjë e kundërshtimit të asaj që po ndodh me ish-kryeministrin Berisha. Ky i fundit përmes avokatëve të tij sqaroi se do të apelonte vendimin që e cilësoi të urdhëruar nga kryeministri Edi Rama.
