Kryeministri Edi Rama ka folur për herë të parë për hetimet e nisur nga SPAK për korrupsion ndaj ish ministrit të Shëndetësisë, Ilir Beqaj, ku dyshohet se ka lidhje me disa kompani farmaceutike, teksa dyshohet edhe për pasuri të fshehura si restorant apo makinë.
Gjatë konferencës me gazetarët, Rama tha se Beqaj dha dorëheqjen nga posti i Agjencisë Shtetërore të Programimit Strategjik dhe Koordinimit të Ndihmës, SASPAC, sapo u vu nën akuzë dhe sipas tij, kjo tashmë është në dorë të drejtësisë.
Në lidhje me agjencisë të drejtuar më parë nga Beqja, Rama u shpreh se ky institucion nuk menaxhon fonde as të Bashkimit Europian dhe as të donatorëve dhe sipas tij, nuk ishte as kryenegociator.
“Ilir Beqaj në sekondat që u vu në një akuza iku nga detyra. Të jemi të qartë. Ilir Beqja në sekondën, u vu në akuzë dha dorëheqjen që të jemi shumë të qartë dhe u hap procesi për zëvendësimin e tij dhe nuk është kryenegociator. Ishte koordinator i ndihmës në një institucion që nuk menaxhon fonde të BE-së nuk menaxhon fonde të asnjë donatori është një zyrë koordinimi në funksion të qeverisë shqiptare dhe një urë komunikimi me të gjithë donatorët për të gjitha proceset e akordimit të fondeve të huaja të cilat nuk kalojnë nga kjo zyrë por nga entitete e tjera që i disponojnë dhe më pas kryejnë procedurat e tyre. Zhurma e bërë për zhvatje fondesh të BE-së është një gënjeshtër pasi zyra nuk menaxhon fonde të BE-së. Nuk i kalon fonde as nga BE-ja dhe nga asnjë institucion tjetër. pastaj ajo që i përket çështjes në fjalë nuk ka fare lidhje me punën e qeverisë dhe timen ka lidhje me punën organeve të drejtësisë janë pyetje që nuk duhet ti adresohen qeverisë është punë e drejtësisë të vazhdojë drejtësia. Fakti që dikush merrte në hetim nuk është provë faji.”– tha Rama.
I pyetur në lidhje me shprehjen e përdoru më parë prej tij, se nuk ka hajdut mbi 2 metra, Rama i kërkoi gazetarit që ta tëhiqte fjalën mbrapasht, pasi sipas tij, një “hajdut” e shpall vetëm gjykata dhe për kreun e qeverisë, Beqaj është vetëm nën akuzë për shpërdorim detyre.
“Se kush është hajdut nuk e cakton as ti as unë, por gjykata. Mesa di unë akuza është për shpërdorim detyre jo korrupsion. Sepse hajdut është fjalë e madhe dhe liria e fjalës për të damkosur dikë si hajdut është abuzim. Përpara së të bëjmë gjyq popullor, ju mund të ngrini dyshime, por jo fjalën hajdut, atë ja vendos gjykata. Mbetet për t’u parë. Fjalën duhet ta marrësh mbrapsht, se deri më tani nuk ke prova, kur të dalin provat mund të ta rishikoj shprehjen. Nuk mundet që një njeri nën hetim ta bëjmë kriminel. Kjo nuk shkon.” – u shpreh Rama.
