Detaje të reja kanë dalë në dritë nga masakra që ndodhi një ditë më parë në një universitet në Pragë, ku u vranë 15 persona dhe u plagosën 25 të tjerë.
Policia vijon punën në vendin e ngjarjes dhe deri më tani janë identifikuar 11 viktima.
Gjendja e të plagosurve është e qëndrueshme. Pacientët u qëlluan në kokë, gjoks ose gjymtyrë, disa iu nënshtruan operacionit. Mediat çeke raportojnë se njerëzit kanë dhuruar miliona për të ndihmuar të prekurit nga tragjedia në Fakultetin Filozofik në Pragë.
Sipas të dhënave, mbi 2.5 milionë dollarë u grumbulluan në fondin e donacionit të Universitetit Charles.
Kryeministri çek Petr Fijala njoftoi se qeveria shpalli të shtunën, 23 dhjetor, ditë zie kombëtare për shkak të të shtënave. Ai u bëri thirrje qytetarëve të Republikës Çeke të mbajnë një minutë heshtje më 23 dhjetor në orën 12:00 për të nderuar viktimat, duke shtuar se në atë kohë do të bien edhe kambanat e kishave në të gjithë vendin.
