Një 36-vjeçar është arrestuar këtë të martë në Dibër, pasi ka thyer masën e arrestit shtëpiak.
Blutë bëjnë me dije se në pranga ka rënë shtetasi Ditar Cerjani. Ndaj 36-vjeçarit, gjykata kishte caktuar masë arrest në shtëpi për prodhim dhe shitje të lëndëve narkotike, si dhe drejtim mjeti në mënyrë të parregullt.
“Si rezultat i kontrolleve të mbështetura tek informacionet e siguruara nga inteligjenca policore dhe të kryera në vijim të megaoperacionit “Sundimi i ligjit”, shërbimet e Komisariatit të Policisë Dibër në bashkëpunim me shërbimet e Pikës së Kalimit Kufitar Morinë, kapën dhe ndaluan shtetasin e shpallur në kërkim Ditar Cerjani, 36 vjeç, banues në Dibër, i cili tentoi të kalonte drejt shtetit të Kosovës.
Ky shtetas kishte thyer masën e sigurisë “Arrest në shtëpi”, të caktuar nga Gjykata e Shkallës së Parë e Juridiksionit të Përgjithshëm Dibër, për veprat penale “Drejtimi i automjetit në mënyrë të parregullt” dhe “Mosbindja ndaj urdhrit të punonjësit të policisë së rendit publik”, “Prodhimi dhe shitja e lëndëve narkotike”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.
