Është arrestuar në Kosovë, Gëzim Çela i shpallur në kërkim nga SPAK në vijim të operacionit të koduar “Flakë në Det”, të ekzekutuar në muajin gusht, ku u godit një tentativë e trafikimit të drogës me varkë velierë nga lugina e Patokut në drejtim të Italis. Më konkretisht dyshohet se do shkëmbehej në mes të detit kanabis me kokainë, ku dyshohej për rreth 1 ton kanabis, por që u dogj nga ana e trafikantëve.
SPAK e akuzon Gëzim Çelën për veprat penale “Trafikimi i narkotikëve”, kryer në bashkëpunim në kuadër të grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata krimianle dhe grupi i strukturuar kriminal”.
Në muajin gusht, Policia e Shtetit arrestoi në kuadër të këtij operacioni kushëririn e Gëzim Çelës, Nerim Çela, si dhe ish-punonjësin e Policisë së Shtetit, Arlind Ismailukaj, Armando Mema, Besnik Brokeri nga Vlora dhe dy korrierët me shtetësi ukrainase Kyrylo Ponomarenko dhe Kostiantyn Biellon.
Ndërsa, më 9 tetor të këtij viti, SPAK lëshoi 4 urdhër-arreste të reja, ku u arrestua shefi i komisariatit të Kurbinit, Dritan Metaj, si dhe u shpallur në kërkim Gëzim Çela i njohur si “Baroni i Drogës”, Arben Dalipaj nga Vlora dhe Roland Guzo nga Durrësi.
Arrestimin e Gëzim Çelës e ka konfirmuar edhe ministri i Brendshëm, Taulant Balla, i cili bën me dije se “Baroni i Drogës” është vënë në pranga në bashkëpunim me një agjenci të rëndësishme partnere dhe me strukturat ligjzbatuese të Republikës së Kosovës.
“Forca e ligjit do të godasë mbi këdo dhe pandërshkueshmëria do të marrë fund ndaj kujtdo që kujton se do të vazhdojë t’i fshihet drejtësisë. Përgëzoj Policinë e Shtetit, e cila në bashkëpunim me një agjenci të rëndësishme partnere dhe me strukturat ligjzbatuese të Republikës së Kosovës kanë bërë të mundur arrestimin e shtetasit Gëzim Çela, një person i dënuar dhe i kërkuar prej shumë kohësh nga drejtësia në Shqipëri.” – shkruan Balla.
Çmontimi i grupit të Gëzim Çelës e ka zanafillën që në muajin Prill 2023, ku në zonën afër aeroportit të Rinasit u arrestua Armando Papa, pasi në bagazhin e automjetit të tij, efektivët e Policisë gjetën një sasi prej 42 kg heroinë.
Autoritetet kanë dyshime të forta se Armando Papa është korrieri i Gëzim Çelajt dhe Arben Dalipajt. Vlera e heroinës në treg llogaritet në gjysmë milioni euro. Hetimet e këtij rasti i ka ndjekur SPAK, pasi zbuloi se në këtë linjë të trafikut të drogës, ishte i përfshirë Gëzim Çelaj dhe vlonjati Arben Dalipaj.
Gëzim Çela ka qenë më herët subjekt i “OFL”-së teksa ka mundur t’i shpëtojë drejtësisë. Ai ishte shpallur në kërkim ndërkombëtar që prej vitit 2015, pas një vendimi të dhënë nga Gjykata e Krimeve të Rënda.
Gjatë hetimit të asaj periudhe, Çelën shfaqet si organizator dhe financues i një grupi kriminal, që kryente trafikun e heroinës dhe hashashit në Kosovë, Greqi dhe në Itali. Çela, rezulton i dënuar me 20 vite burgim nga Gjykata e Krimeve të Rënda, por që nga viti 2015, policia nuk ka mundur ta lokalizojë dhe arrestojë, megjithëse ka pasur mjaft informacione se ai qëndron i lirë në zonën e lagunës së Patokut.
Çela ka vijuar aktivitetin e tij i pashqetësuar. Ndërsa grupi ku ai është dënuar për herë të parë, përbëhej nga Valentina Tufina e njohur si “Tezja e Kokainës”, Fran Mërdhoci, Alfred Mikeli, Arif Çela, Viktor Lekgega, Reald Hysolli etj.
Çela dyshohet se përdorte vilën e tij në Fushë Kuqe për trafik droge, pasi pikërisht aty, policia i gjeti 18 kilogramë kokainë kohë më parë. Për t’u shmangur arrestimit, Gëzim Çela lëvizte në të njëjtin automjet me shefin e komisariatit të Kurbinit, Dritan Metaj, i arrestuar në muajin tetor.
Gëzim Çela ka qenë një ish-efektiv Policie, teksa për të ka patur akuza edhe nga drejtësia italiane dhe për shfrytëzim prostitucioni, trafik lëndësh narkotike dhe vrasje, por gjithmonë ka arritur t’i shpëtojë burgut.
