Prishtina është tronditur nga një tjetër krim i rëndë mbrëmjen e të mërkurës, pasi një person dyshohet se ka vrarë me thikë vjehrrin e tij. Ngjarja dyshohet se ka ndodhur rreth orës 22:00, në rrugën “Ali Vitia” të kryeqytetit kosovar.
Mediat vendase raportojnë se 29-vjeçari, Edon Bujupi ka vrarë me thikë vjehrrin e tij, 52-vjeçarin Ali Kosova. Pas krimit, i riu është arratisur nga vendi i ngjarjes me një automjet tip “Mercedes Benz” dhe ende nuk është kapur nga Policia.
Për rastin në fjalë, ka ardhur një reagim edhe nga Policia e Kosovës, ku kanë bërë me dije se 52-vjeçari është dërguar në QKUK, por nuk ka arritur t’iu bëjë ballë plagëve nga goditjet me thikë dhe ka ndërruar jetë.
Konfliktin mes palëve që përfundoi tragjikisht, e kanë konfirmuar familjarët e të ndjerit. Ata kanë pohuar se Bujupi ka goditur me thikë 52-vjeçarin, duke i shkaktuar plagë fatale për jetën.
Edon Bujupi pak ditë para se të kryente vrasjen ishte shpallur i zhdukur nga bashkëshortja e tij. Rasti i zhdukjes ishte raportuar edhe në raportin 24 orësh të Policisë, të së premtes së 25 nëntorit.
Siç u bë e ditur, bashkëshortja e Bujupit ka raportuar në polici se ai kishte dalë nga shtëpia të premten dhe se nuk dinte asgjë për vendndodhjen e tij. Pasi 29 vjeçari ishte kthyer në shtëpi, Ali Kosova, babai i gruas kishte shkuar te shtëpia e tij dhe pas një konflikti u godit me thikë për vdekje.
Prishtina u trondit dhe nga një tjetër krim i rëndë brenda pak orësh, pasi më herët Liridona Murseli, bashkëshortja e ish-këshilltarit të presidentit Behgjet Pacolli, Naim Murseli, mbeti e vrarë pas të shtënave që u dëgjuan në rrugën “Dalip Alshiçi”. Familja Murseli dyshohet se u përballën fillimisht me disa grabitës, të cilët ua morën sendet me vlerë dhe më pas me të shtënat me armë, duke lënë të vdekur 33-vjeçaren. Kjo ngjarje tronditi gjithë familjen Murseli dhe hetimet tashëm kanë nisur për të zbardhur rrethanat dhe motivet e rastit.
