Kreu i Partisë Demokratike, Sali Berisha ka kryer homazhe në memorialin e Ismail Qemalit në Vlorë në kuadër të 111-vjetorit të Pavarësisë së Shqipërisë.
Pas homazheve, gjatë një prononcimi për mediat Berisha fillimisht ka uruar shquiptarët dhe u ka bërë thirrje që të bashkohen për të rrëzuar atë të cilën e quajti regjimi i Ramës.
Gjithashtu Berisha ka bërë edhe një premtim politik, duke thënë se “Edi Ramën do ta paketojnë dhe do ta çojnë në Serbi”.
“Sot, mbarë shqiptarët, kudo që janë, përulen me mirënjohjen më të pakufishme, nderimin më të madh, para veprës së pavdekshme të Ismail Bej Vlorës, ditës së Flamurit Kombëtar, ditë e të gjitha ditëve të kombit shqiptar. Me aktin e tij të një vizioni dhe kurajo të jashtëzakonshme, Ismail Bej Vlora, bëri të mundur ekzistencën e Shqipërisë dhe kombit shqiptar. Pa këtë akt, Shqipërinë dhe shqiptarët i prisnin greminat, honet e historisë. Sot, ata janë anëtarë të NATO-s, Kosova është e pavarur.
Unë erdha këtu për t’u betuar para varrit të Ismail Bej Vlorës, se Pashiqi shqiptar, që sapo ka vendosur kurorën aty, e ka të fundit, sepse shqiptarët, në Shqipëri, Kosovë dhe kudo që ndodhen, do e paketojnë atë në Beograd, aty ku e ka vendin. Tradhtar si ky, kombi nuk ka pasur ndonjëherë në histori. Dhe ky është një zotim solemn përpara Babait të Pavarësisë se edhe njëherë, Pashiqi nuk do ketë vend në Tiranë, por të shkojë në Beograd te padroni i tij Vuçiç. Gëzuar qytetarë dhe qytetare të Vlorës, gëzuar shqiptarë dhe shqiptare kudo që jeni, këtë ditë të bekuar, këtë feste të të gjitha festave tona. Rroftë flamuri ynë, nderim përjetë Ismail Bej Vlorës dhe etërve të pavarësisë. Sot jemi në një diktaturë të egër që po shkatërron Shqipërinë, sot duhet të bashkohen shqiptarët dhe të betohemi para Ismail Qemalit sepse sot Shqipëria nuk do të jetë e pushtuar nga vëllai i Vucicit.
Shqiptarët, kur një e treta e kombit në një hark kohor 8-vjeçar, ka braktisur Shqipërinë, janë në një diktaturë të egër, e cila po e shkreton Shqipërinë. Ndaj dhe kjo është një ditë që duhet t’i bashkojë shqiptarët, të betohen para Ismail Bej Vlorës dhe etërve të tjerë të pavarësisë, se Shqipëria nuk do jetë më e sunduar nga Pashiqi apo vëllai i Vuçiçit siç e quajnë në Kosovë, apo argati i Beogradit, siç e kanë quajtur rëndom në Tiranë, Edi Rama… …Nuk kisha asnjë ftesë, pro edhe po të kisha ftesë, me Pashiqin te varri i Ismail Qemalit nuk do vija kurrë. …Si mund të bashkohem bashkë me atë, i cili ndjek po atë linjë të viteve të fillimit të shekullit të ndarjes dhe përçarjes së shqiptarëve. Nuk ka bashkim me të, ka betejë pa kthim gjer në largimin e tij në Beograd”, deklaroi Berisha.
Dita e Flamurti duket se ka thyer “akullin” në raportet mes kryeministrit Edi Rama dhe kryeministrit të Kosovës, Albin Kurti, të cilët janë bërë bashkë në Vlorë. Ata kanë qenë të pranishëm në ceremoninë simbolike të ngritjes së flamurit kuqezi në Vlorë.
