Trajneri i Interit, Simone Inzaghi i është përgjigjur pyetjeve të gazetarëve, në prag të supersfidës ndaj Juventusit që do luhet të dielën mbrëma, për llogari të Serie A. Numri një i pankinës zikaltër, e cilësoi ndeshjen si mjaft të vështirë, por theksoi se skuadra e tij synon vetëm 3 pikët.
“Do të jetë një ndeshje e madhe, luan vendi i parë me vendin e dytë. Të gjithë e dimë rëndësinë e kësaj ndeshje, përballen dy skuadra që janë të ngjashme dhe që kanë marrë shumë pikë deri në këtë fazë të kampionatit.
A e prisja që Juventus të ishte kaq pranë Inter? Sigurisht që po, kanë një trajner të shkëlqyer si Allegri. Juventus ka një skuadër shumë të mirë dhe ata duan të fitojnë gjithmonë. Këtë vit kanë edhe më shumë kohë për të përgatitur ndeshjet pasi nuk janë në Europë, e dimë të gjithë që ky është një avantazh i madh. Megjithatë, ne nuk fshihemi dhe i dimë shumë përgjegjësitë dhe objektivat tonë. Ndaj Juventus nuk do të jenë Bastoni dhe Pavard, ndërsa më duhet të vlerësoj gjendjen e Cuadrados dhe Sanches. Cuadrado është një lojtar i madh, por iu shfaqën disa probleme në tendinë të cilat nuk i ka pasur kurrë më parë. Kjo na ka penalizuar. E përsëris që ndeshja me Juventus nuk do të jetë vendimtare. Do të jetë e rëndësishme kjo kuptohet, por mbeten edhe shumë sfida të tjera për t’u luajtur”, tha ai.
