Apeli i Gjykatës së Posaçme zbuti masën e sigurisë ndaj Jamarbër Malltezit, nga arrest me burg në arrest shtëpiak. Ndërkohë, nuk ndryshoi masën e detyrim paraqitjes për kreun e PD-së, Sali Berisha.
Vendimi u dha këtë të martë nga gjyqtarja Iliriana Olldashi, pas ankimit të mbrojtjes, që u shqyrtua në një seancë të shtrirë në dy ditë.
Malltezi akuzohet nga SPAK për “korrupsion aktiv” dhe “pastrim parash”, ndërsa Berisha për veprën penale të “korrupsionit pasiv” në procedimin penal për privatizimin e kompleksit sportiv “Partizani”. Akuza që janë hedhur poshtë nga të dy, ndërsa i kanë cilësuar thellësisht politike. Në ligjërime të ndryshme publike, kryedemokrati Sali Berisha ka argumentuar pse sipas tij, nuk qëndrojnë akuzat e SPAK. Për strukturën hetimore ka deklaruar se ka vepruar me urdhër të kundërshtarit të tij politik, kryeministrit Edi Rama.
Pas vendimit të sotëm, një prononcim për mediat mbajti mbojtësi ligjor i Berishës dhe Malltezit, e cili theksoi se çështja është “politike”.
“Që kjo çështje është politike, u bëj me dije edhe faqen e kallëzimit, në të cilin keni edhe kallëzimin, edhe regjistrimin e procedimit brenda një dite. Është e pamundur që për çështje të tilla voluminoze, brenda një dite kalendarike pune të ndiqej kjo procedurë. Ne do të vazhdojmë betejën tonë ligjore. Gjykimi dje u karakterizua nga një gjuhë e drunjtë e Prokurorisë dhe një heshtje e gjykatësve, që sigurisht në atë pozicionin e vet, nuk kanë rol aktiv”, tha avokati Genc Gjokutaj.
I pyetur nëse Berisha do të paraqitet të hënën e parë të muajit dhjetor në SPAK siç e parashikon vendimi i GJKKO i lënë në fuqi tanimë dhe nga Apeli, Gjokutaj tha: “Ne kemi seancë tjetër të enjten për humbjen e fuqisë. Beteja do të jetë e gjatë, ne do të shfrytëzojmë të gjitha burimet tona.”
Ndërsa pyetjes se a ka mundësi të ashpërsohet masa ndaj Berishës, ai iu përgjigj: “Ashpërsimi i masave të sigurimit ka të bëjë me rrezikun e ikjes. Z. Berisha nuk ka rrezik që të ikë. Siç ju thashë, dy herë në javë është në parlament, ndërkohë që prokuroria e kërkon njëherë në dy javë. Por nuk është ky problemi. Problemi ëhstë ligjor, që ajo masë, detyrim paraqitje, rrjedh nga një proces antikushtetues dhe antiprocedurial penal”.
