E premtja u mbyll me tre aksidente të rëndë me pasojë vdekjen e tre qytetarëve. Ngjarja e parë, që rezultoi fatale, u shënua në orët e para të mëngjesit në unazën e Shkozetit. Një 32-vjeçar që qarkullonte me një automjet përplasi një person që lëvizte me biçikletë. 50-vjeçari si pasojë e përplasjes humbi jetën duke mos u mbijetuar plagëve të marra. Policia e Durrësit shoqëroi drejtuesin e automjetit për të sqaruar rrethanat e ngjarjes.
Dy aksidentet e tjera ndodhën në Elbasan dhe Kuçovë, ku humbën jetën dy qytetarë.
Në fshatin Tapi në qytetin e Kuçovës, u përplas për vdekje një 67-vjeçar që qarkullonte në anë të rrugës me biçikletë. Ai u aksidentuar nga një 21-vjeçar, i cili po drejtonte një mjet tip Audi, rreth orës 17:30. Edhe pse u transportua menjëherë drejt spitalit 67-vjeçari nuk arriti të mbijetojë. Pas përplasjes, mjeti i drejtuar nga i riu kaloi në anën tjetër të rrugës, duke thyer betonin anësor dhe më pas përfundoi në oborrin e një banesë.
Sipas policisë, ka dyshime se i riu po udhëtonte me shpejtësi, në momentin e aksidentit. 21-vjeçari pasi mori mjekim në spitalin e Kuçovës, u shoqërua nga policia në komisariat.
Ndërsa rreth orës 19:35, në unazën e qytetit të Elbasanit, një automjet që drejtohej nga një 20-vjeçar aksidentoi një 74-vjeçar, i cili për pasojë ndërroi jetë gjatë transportimit me ambulancë, në spital. Edhe në këtë rast, policia shoqëroi drejtuesin e mjetit në komisariat.
