Kreu i Partisë Demokratike, Sali Berisha ka paralajmëruar se do të vijojë beteja e opozitës në Kuvend.
Brenda Kryesisë së Kuvendit, Berisha theksoi se Parlamenti është shndërruar në “një aneks të Surrelit”, ndërsa hallet e qytetarëve janë harruar.
Berisha theksoi nevojën për t’u ngritur Komisionet Hetimore të cilat me transparencë duhet të pasqyrojnë vendimet e ministrave dhe kabinetit qeveritar.
“Vazhdimi i betejës pa kthim të deputetëve të opozitës. Parlamenti është shndërruar në një aneks të Surrelit, ka humbur çdo funksion si tempull i demokracisë së Shqipërisë, ndaj dhe deputetët e opozitës, në emër të popullit opozitar, qytetarëve që besojnë tek vlerat e demokracisë, që konsiderojnë pluralizmin motorrin kryesor të saj, që besojnë se ministrat, pushtetarët dhe cilido duhet të hetohen nga Komisionet Parlamentare me transparencë, duhet të pasqyrohen e gjithë veprimtaria ligjore, apo antiligjore, kushtetuese apo antikushtetuese e tyre.
Një nen me rëndësi kapitale në Kushtetutë duhet të respektohet. Ligjet, rezolutat, amendamentet e opozitës, duhet të përcillen në përputhje me procedurën parlamentare. Sikundër kurrë ndonjëherë qeveria nuk mund të mendojë të caktojë përfaqësuesit e opozitës në Komisionet Parlamentare.
Këto janë kërkesat më themelore për të cilat deputetët e opozitës janë të vendosur në këtë beteja pa kthim gjer në fitoren e tyre”, tha Berisha.
