Është zbardhur vendimi i Gjykatës së Posaçme (GJKKO) për masat e sigurisë të caktuara ndaj kreut të PD-së, Sali Berisha në lidhje me hetimet për çështjen e ish-kompleksit Partizani. GJKKO ka caktuar masën e sigurisë “detyrim paraqitje” ndaj liderit demokrat dhe “ndalim i daljes jashtë shtetit” duke i bllokuar pasaportën.
Berisha e ka konsideruar këtë vendim si anti-kushtetues, pasi sipas tij, duhej të dërgohej në Kuvend për heqjen e imunitet, pasi i kufizohet liria. Por, sipas GJKKO, nuk kemi të bëjmë me kufizim të lirisë edhe pse i është bllokuar dalja jashtë shtetit. Sipas tyre për këtë masë nuk ka nevojë të kërkohet autorizim nga Kuvendi.
Në vendimin thuhet se mbrëmjen e 21 tetorit dy oficerë të policisë gjyqësore shkuan në selinë e PD për t’i kopmunikuar Berishës vendimin e dhenë në mungesë. Por dy oficerët e patën të pa mundur ta njoftonin Berishën.
Më tej shkruhet në vendim, oficerët shkuan në banesën e tij në rrugën ‘Mustafa Matohiti’ në orën 01:00 pak pas mesntae. Dera u hap nga i biri i tij, shtetasi Shkëlzen Berisha, i cili i tha efektivëve se babai nuk dëshironte të takonte njeri, madje orari ishte i pa përshtatshshëm duke i kërkuar të vinin të nesërmen.
Mëngjesin e 22 tetorit sërish punonjësit e policisë shkuan për t’i komunikuar Berishës vendimin, por dera e banesës u hap nga vajza e tij Argita Malltezi që njoftoi se banesa e babait të saj gjendet në katin e katërt të pallatit dhe jo ne katin e tetë.
Deri më tani, Berisha ka refuzuar të paraqitet në SPAK dhe mbetet të shihet nëse GJKKO do të caktojë masë më të ashpër sigurie apo jo.
Berisha akuzohet nga SPAK për kryerjen e veprës penale “Korrupsioni pasiv i funksionarëve të larte shteterore ose te zgjedhurve vendore, kryer në bashkëpunim, parashikuar nga neni 260 e 25i Kodit Penal.
Ish-kryeministri i ka konsideruar akuzat ndaj tij dhe arrestimin e dhëndrit të tij Jamarbër Malltezi, si sulm politik, pasi sipas tij, nuk ka asnjë fakt dhe dokument që të ngrihen dyshimet mbi akuzat.
Sipas SPAK-ut, Berisha kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
Ndërsa, për Jamarbër Malltezin dhe ndërtuesin Fatmir Bektashi, edhe ky i fundit nën masën “detyrim për paraqitje”, SPAK-u deklaron se ata kanë përfituar shuma të mëdha financiare nga tjetërsimi i truallit në ndërtime të larta.
