“Shqipëria nuk do jetë kurrë, një vend ku vende shumë të pasura do krijojnë kampe për refugjatët e tyre. Asnjëherë!”
Kështu ka deklaruar kryeministri Edi Rama më 19 nëntor të vitit 2021, kur është pyetur nga gazetarët rreth një artikulli të publikuar nga mediat britanike ku thuhej se në Shqipëri do të krijohej një kamp ku do të strehoeshin të gjithë refugjatët që do të kapeshin në kanalin mes Francës dhe Britanisë së Madhe.
Por, duket se rreth dy vite më pas, kryeministri Rama ka ndryshuar mendje dhe sot nënkshkroi marrëveshjen me homologen italiane Giorgia Meloni për strehimin në Shqipëri të refugjatëve nga vendet e Afrikës që kapen në brigjet e Italisë, me përjashtim të të miturve, grave shtatzëna dhe subjekteve vulnerabël.
Në portin e Shëngjinit do të mbahen procedurat e zbarkimit dhe identifikimit të refugjatëve, ndërsa më në brendësi, më konkretisht në Gjadër, do të ngrihen kampet në modelin e Qendrave të Mbajtjes së Riatdhesimit (Cpr), që do të mund të strehojnë deri në 3 mijë refugjatë, për një parashikim prej 39 mijë personash të mirëpritur në një vit. Më pas, do të vijohet me procedurat, nëse do të mund të pranohet azili ose jo.
“Corriere della Sera” raportoi se protokolli u mbyll në thelb gushtin e kaluar (gjatë takimit që dy liderët zhvilluan dhe që u cilësua si një festë e thjeshtë) dhe do të jetë funksional në pranverën e vitit 2024. Media italiane, duke iu referuar burimeve të Palazzo Chigi, shkruan se nuk parashikohet asnjë kompensim ekonomik në favor të Shqipërisë.
