Kategoria Superiore vijon të luajë sot javën e 12-të të saj me 3 superndeshje, teksa luhet në aksin Kukës –Durrës- Korçë.
Ndeshja e parë është ajo mes Kukësit dhe Dinamos duke nisur që nga ora 13:30.
Blutë e kryeqytetit pas fitores së fundit do të tentojnë një tjetër 3 pikësh, ndërsa verilindorët pas humbjes mes shumë kontestimesh synojnë autokritikën përballë tifozëvë.
Në orën 17:00 do të luhen paralelisht dy sfida. Teuta – Laçi do të matin forcat në “Niko Dovana”, ndërsa Skënderbeu-Tirana do të duelojnë mes tyre në Korçë.
Si durrsakët ashtu edhe kurbinasit do të tentojnë rikthimin te fitorja në kampionat pas rezultateve të javës së fundit
Gjithashtu bardheblutë e Julian Ahmatajt kërkojnë vazhdimësinë, ndërsa korçarët kanë detyrim vetëm 3 pikët.
Sfida e fundit e kësaj jave do të luhet ditën e hënë në orën 18:00. Në “Arenën e Demave” do të përplasin “brirët” Partizani dhe Vllaznia.
Demat janë skuadra e momentit në kampionat, pasi kanë arritur 5 fitore rresht dhe në shtëpinë e tyre tentojnë një tjetër 3 pikësh.
Ndërkohë shkodranët pas barazimit me Erzenin do të udhëtojnë në kryeqytet vetëm për 3 pikët, pasi në të kundërt do të rrezikojnë shumë në klasifikim.
