Sulmuesi argjentinas, Lionel Messi, është shpallur fitues i “Topit të Artë” për vitin 2023.
Në ceremoninë e sotme, e mbajtur në Theatre du Chatelet, në Paris, “pleshti” mori epitetin e më të mirit në botë për vitin 2023 kryesisht pas paraqitjeve për kombin e tij, Argjentinën.
Triumfi në Botërorin e Katarit ishte vendimtar teksa Lionel Messi udhëhoqi Albicelestet drejt titullit të tretë në histori. “Pleshti” fitoi kështu garën me konkurrentin e tij më të fortë Erling Haaland teksa norvegjezi ishte protagonisti kryesor në tre titujt e Manchester Cityt sezonin e kaluar, Premier League, Champions League dhe FA Cup.
Ky ishte trofeu i 8-të për Messin që thellon edhe më shumë diferencën me rivalin e tij të madh Cristiano Ronaldo që mbetet në kuotën e pesë trofeve ndërsa sa i përket të ardhmes, bëhet gjithnjë e më e vështirë për dikë të kalojë rekordin e argjentinasit.
Menjëherë pas fitimit të trofeut të tetë në karrierë të Topit të Artë, Lionel Messi ka një dedikim special.
“Do të doja të falënderoja Diegon Maradonën për ditëlindjen e tij, nuk do të kishte vend më të mirë për ta uruar se sa ky në këtë ditë. Gëzuar ditëlindjen Diego”. Dua të falënderoj të gjithë njerëzit që më votuan. E ndaj këtë trofe me bashkëlojtarët e mi në kombëtare, është një dhuratë për të gjithë Argjentinën”.
Pastaj një pasazh për Haaland i cili pati një vit spektakolar. “Unë shoh shumë të rinj dhe jam i sigurt se ata do të na japin futboll të madh”.
Sa i takon çmimeve të tjera të fituara mbrëmjen e sotme, lojtari i ri më i mirë u shpall Bellingham, portieri më i mirë u vlerësua argjentinasi Emiliano Martinez, ndërsa çmimi i bamirësisë iu dha Vinicius-it.
Golashënuesi më i mirë? Erling Haaland. Sulmuesi i Manchester Cityt realizoi jo pak por 56 gola. Pas fitimit të Champions League, skuadra më e mirë është parë e arsyeshme të vlerësohet Manchester City.
Çmimet e mbrëmjes:
“Topi i Artë” për femra: Aitana Bonati
“Topi i Artë” për meshkuj: Messi
Çmimi Sokrates (i bamirësisë): Vinicius
Çmimi Gerd Muller (Golashënuesi): Haaland
Portieri më i mirë: Emiliano Martinez (Aston Villa)
Trofeu për të riun më të mirë të sezonit: Jude Bellingham (Real Madrid)
Skuadra më e mirë: Manchester City
